Nga: Blendi Gashi
Ndeshja e futbollit ndërmjet Shqipërisë dhe Serbisë, e cila luhet sonte në “Elbasan Arena”, dhe është e vlefshme për kualifikimet për në kampionatin europian të futbollit “Francë 2016”, është tema kryesore për të cilën flasin dashamirët e futbollit në Kosovë.
Në Prishtinë, por edhe në qytete të tjera, shumica e kafeneve kanë vendosur ekranet e mëdha, në mënyrë që kjo ndeshje të përcillet nga mysafirët. Të gjithë shqiptarët, kudo që gjenden, do të ulen me ankth sonte në orën 20:45 para ekraneve televizive në shtëpitë e tyre, e njëkohësisht me plot besim do të presin që djemtë kuqezi të dalin fitues ndaj serbëve, për të festuar më pas deri në orët e para të mëngjesit.
Kjo ndeshje futbolli do të jetë shumë e rëndësishme për kombëtaren shqiptare në realizimin e ëndrrës drejt europianit “Francë 2016”. Por, në anën tjetër, do të jetë sfidë që do të luhet nën masa të rrepta sigurie, duke ditur se çfarë ndodhi më 14 tetor të vitit të kaluar në Beograd, ku futbollistët shqiptarë u sulmuan në fushë nga tifozët huliganë serbë.
Portali mbarëkombëtar tesheshi.com ka marrë mendimin e trajnerëve dhe ish-lojtarëve të ekipeve kosovare për supersfidën Shqipëri-Serbi. Ata janë shprehur optimistë se kombëtarja kuqezi ka për ta mposhtur me lehtësi Serbinë dhe do të jetë e pranishme vitin e ardhshëm në Francë. Trajnerët kosovarë presin që takimi të përfundojë pa probleme, duke u shprehur se në Elbasan nuk do të ndodhë ajo çfarë ngjau në Beograd.
“Mund të triumfojmë me kokën e ftohtë e këmbët e nxehta”
Trajneri i mirënjohur kosovar Bilbil Sokoli ka thënë për tesheshi.com se kjo ndeshje do të ketë rrjedhë normale, e se është mundësia t’i tregojmë botës për kulturën tonë sportive . 
“Epilogu i takimit vështirë se mund të parashikohet. Serbët nuk kanë çka të humbasin, kurse kombëtarja jonë duhet ta fitojë takimin nëse dëshiron të jetë në ‘Francë 2016’. Jam optimist për rezultat pozitiv,” ka deklaruar Sokoli.
Afrim Tovërlani, ish-trajneri i Prishtinës, mendon se nuk do të ketë trazira në sfidën e së enjtes. Ai thotë se Shqipëria do të kualifikohet nëse e mund Serbinë dhe, në të njëjtën kohë, nuk fiton Danimarka.
“Besoj se mund ta fitojmë ndeshjen me Serbinë. Mund të triumfojmë me kokën e ftohtë e këmbët e nxehta. Kualifikimi do të ishte i sigurt nëse mundim Serbinë dhe, njëkohësisht, Danimarka nuk e mposht Portugalinë,” thotë Tovërlani.
Trajneri i Besës së Pejës, Arbnor Morina, është shprehur në një deklarim për portalin tesheshi.com se kombëtarja shqiptare është më homogjene se Serbia, e cila ka probleme të brendshme, andaj nuk duhet të biem në provokimet e kundërshtarit.
“Mendoj që kemi forcë dhe dituri ta përfundojmë ndeshjen në favorin tonë dhe ta realizojmë ëndrrën
tonë të kahmotshme,” janë fjalët e Morinës.
Tahir Lushtaku, ish-trajneri i klubit futbollistik Drenica, është shprehur tejet optimist se kombëtarja jonë do ta mposhtë Serbinë, edhe pse kjo e fundit është një skuadër me përvojë dhe nuk ka çfarë të humbasë.
“Lojtarët që luajnë këtë ndeshje historike duhet të kenë shumë kujdes dhe të mos i kaplojë euforia, por të jenë të përgatitur maksimalisht, të japin gjithçka në fushë, e në fund të triumfojnë,” ka bërë të ditur ai.
Lushtaku beson fuqishëm se Shqipëria do të jetë në Francë dhe do të luajë një rol të rëndësishëm në europian.
Ish-sulmuesi i rrezikshëm pejan, Haxhi Zeka, ka besim maksimal se kombëtarja shqiptare ka për ta mundur pa probleme Serbinë.
“Besoj se jemi shumë afër kualifikimit në europian,” ka thënë Zeka për tesheshi.com, duke shtuar se ndeshja do të shkojë mirë dhe nuk do të ketë incidente në stadium.
Përndryshe, Shqipëria do ta luajë ndeshjen e fundit, ndaj Armenisë, më 11 tetor, ku përfundimisht do të mësohet nëse do të bëhet realitet ëndrra e kahmotshme, kualifikimi në një aktivitet të nivele të larta, përkatësisht në kampionatin europian që do të zhvillohet në Francë. /tesheshi.com/
