Një treshe shkencëtarësh ka fituar Çmimin Nobel në kimi për studimin e tyre mbi mënyrën si qelizat riparojnë ADN-në e dëmtuar, zhvillime të cilat po ndihmojnë në gjetjen e ilaçeve të reja kundër sëmundjes së kancerit.
Kërkimet e tre shkencëtarëve; suedezit Tomas Lindahl, amerikanit Paul Modrich dhe shkencëtarit turk (me nënshtetësi turko-amerikane) Aziz Sancar, japin të dhëna të rëndësishme mbi mënyrën si funksionojnë qelizat e gjalla, mbi sëmundjet e trashëgueshme dhe mekanizmat që fshihen pas përhapjes së kancerit dhe plakjes, tha Akademia Mbretërore Suedeze e Shkencave.
Studimet e tyre janë kryer në mënyrë të pavarur nga njëri-tjetri.
Shkencëtari turk, Aziz Sancar është biokimist dhe biolog i specializuar në riparimet e ADN-së. Ai ka lindur në një familje kurde në Savur, në rajonin e Mardinit në juglindje të Turqisë. Ai ishte fëmija i shtatë nga tetë fëmijë. Prindërit e tij ishin të pa arsimuar, megjithatë bënë çdo gjë për edukimin e tij.
Ai është anëtar i Akademisë Turke të Shkencave dhe Akademisë Amerikane të Artit dhe Shkencave dhe profesor i biokimisë në Universitetin e Karolinës së Veriut Chapel Hill.
Dr. Sancar ka studiuar procesin e njohur si “riparimi i nukleotideve të ndara”, i cili u mundëson qelizave të riparojnë dëmet në ADN të shkaktuara nga rrezet ultra vjollcë. Njerëzit që vuajnë nga kjo sëmundje mund të preken nga kanceri i lëkurës ku ekspozohen ndaj rrezeve të dritës së diellit.
Çmimi Nobel, i konsideruar si çmimi më prestigjoz për kërkimet në fushën e kimisë, i jepet studiuesve, zbulimet e të cilëve “i sjellin përfitim të madh njerëzimit,” siç ishte caktuar edhe nga vullneti i industrialistit suedez Alfred Nobel, i cili vdiq në vitin 1896.
Fituesit do të ndajnë sëbashku një shumë prej 971 mijë e 200 dollarësh amerikanë. /tesheshi.com/
