Presidenti rus, Vladimir Putin, dhe ministri i Mbrojtjes, Sergej Shojgu, kanë shfrytëzuar një dalje të përbashkët televizive për të njoftuar se tanimë nuk janë vetëm avionët rusë që po godasin në Siri, por edhe luftanijet ruse.
Të gjendura në Detin Kaspik, këto luftanije kanë lëshuar raketa mbi pozicionet e ISIS-it, sipas presidentit dhe ministrit rus.
Putini e bëri të qartë se Rusia është vënë pa mëdyshje në krah të ushtrisë së Esadit kur deklaroi se, “përpjekjet ruse do të sinkronizohen me aksionet e ushtrisë siriane në terren, dhe veprimet e forcave tona ajrore kanë për ta mbështetur në mënyrë efektive operacionin mësymës të ushtrisë siriane.”
Ndërsa përfshirjen e luftanijeve në luftime e qartësoi ministri i Mbrojtjes, i cili deklaroi: “Veç forcave tona ajrore, janë përfshirë katër luftanije të flotës së Kaspikut.” “Intensiteti i goditjeve është në rritje,” ka thënë Shojgu, duke shtuar se luftanijet kishin kryer 26 goditje me raketa kundër 11 objektivave.
Zyrtarët rusë kanë njoftuar se raketat kanë goditur provincat e Halepit dhe Rakkasë në veri, e të Idlibit në veriperëndim.
Ndërkaq, në opinionin ndërkombëtar ekziston bindja se rusët po e përdorin ISIS-in si pretekst, e në vend të tij po sulmojnë opozitën e moderuar siriane.
Posaçërisht Departamenti Amerikan i Shtetit do të deklaronte të mërkurën se pothuajse asnjë prej sulmeve të Rusisë nuk ka patur në objektiv ISIS-in, por opozitën e moderuar. Të njëjtin mendim ka ndarë dhe kryeministri turk, Ahmet Davutogllu, i cili ka dhënë dhe shifra. Sipas tij, nga 57 sulme ajrore ruse, vetëm dy prej tyre kanë patur në shenjë ISIS-in, teksa 55 sulmet e tjera kanë qenë mbi kundërshtarët e moderuar të regjimit sirian. /tesheshi.com/
