Përplasja mes dy Mançesterëve, Sitit dhe Junajtedit, nuk do të sillte asgjë të re, duke u mbyllur ashtu siç nisi: 0-0!
Edhe nëse do t’i kishte patur në fushë Ibrahimovic-in, Pogba-në, Rojo-n e Mata-n, Mourinho nuk do të kishte bërë ndryshe, e jo më pa ta.
Mançester Junajtedi pati gjatë gjithë lojës vetëm 30.8 për qind të zotërimit të topit; shifra më e ulët për të në kampionat që prej nisjes së regjistrimit të kësaj statistike katërmbëdhjetë vite të shkuara.
E pavarësisht kësaj, Mourinho mund të krenohet me faktin se e çoi në 24 numrin e ndeshjeve pa humbje në Premier League. Diçka që nuk ndodh prej 23 tetorit të vitit të shkuar, kur mundej 4-0 nga Çelsi.
Taktika thellësisht mbrojtëse e Mourinho-s la si shenjë vetëm barazimin pa gola, pritjet e De Gea-s, si dhe një karton të kuq të Fellaini-t, që brenda pak sekondave i provon të dy ngjyrat ndëshkuese pas goditjes me kokë të Aguero-s.
Për portugezin, megjithatë, gjithçka është në rregull, ndërsa Mançester Junajtedi mbetet në lojë për vendin e katërt; objektivi maksimal tani në kampionat.
Pritësit, me gjithë presionin e vazhdueshëm, vuajtën mungesën e David Silva-s, lojtarit që i jep vizion e cilësi sulmit të “qytetarëve”. Aguero nuk ia doli ta dërgonte topin në rrjetë, ndonëse u mundua fort për këtë.
Me 65 pikë, Mançester Siti renditet i katërti në klasifikim, pas Liverpulit, të cilin mund ta parakalojë nëse e shfrytëzon si duhet një ndeshje të prapambetur që pret për t’u luajtur. /tesheshi.com/
