Rexhep Tajjip Erdoganit i është hapur rruga për t’u kthyer edhe një herë në drejtim të Partisë për Drejtësi dhe Zhvillim, organizmit politik më të suksesshëm në Turqi në dekadat e fundit, që e qeveris vendin prej pesëmbëdhjetë vitesh.
Një kongres i jashtëzakonshëm i AKP-së parashikohet të mbahet më 21 maj, e në të pritet që presidenti turk të jetë kandidati i vetëm për postin e kryetarit.
Kështu, Erdogani, themeluesi dhe udhëheqësi i parë i AKP-së, do të zëvendësojë në krye të partisë kryeministrin aktual, Binali Jëlldërëm.
“Ne do të jemi të lumtur ta ftojmë presidentin tonë të rikthehet në parti,” njofton Daily Sabah të jetë shprehur Jëlldërëm. “Nuk ka asnjë pengesë që ta ndalojë atë të bëhet kryetar. Por hapi i parë është ta bëjmë atë përsëri një anëtar të partisë sonë.”
Në përputhje me Kushtetutën, Erdogani do ta linte postin e kryetarit të AKP-së në 2014-n me zgjedhjen si president. Amendamentet e reja kushtetuese që morën miratimin në referendumin e 16 prillit ia njohin presidentit të drejtën që t’i mbajë lidhjet me partinë nga vjen, që ta ruajë anëtarësinë në të.
AKP-në do ta drejtonte suksesshëm Ahmet Davutogllu për rreth dy vite, gjer në maj të 2016, kur ai do të jepte dorëheqjen e do të zëvendësohej nga Binali Jëlldërëm. /tesheshi.com/
