Finlanda ka parë një numër rekord të azilkërkuesve pas pushtimit rus të Ukrainës, duke tejkaluar rekordin e vendosur në vitin 2015 gjatë krizës së emigrantëve, thanë sot autoritetet finlandeze.
“Më 4 gusht, njerëzit që u larguan nga Ukraina për shkak të ofensivës ushtarake të Rusisë paraqitën 35,074 aplikime për mbrojtje të përkohshme”, tha në një deklaratë Agjencia Finlandeze e Migracionit.
Më shumë se 37 mijë persona janë regjistruar në sistemin e pritjes, “një numër i paprecedentë”.
Rekordi i mëparshëm në këtë vend skandinav ishte 32,000, gjatë krizës së migracionit të vitit 2015. “Një e treta e atyre që largohen nga Ukraina janë fëmijë,” tha agjencia e migracionit.
Agjencia deri më tani ka përpunuar 33,480 kërkesa për mbrojtje, që do të thotë se pothuajse 95% e aplikantëve kanë marrë tashmë një përgjigje. Në total, mbrojtje e përkohshme u është dhënë 33,231 personave. Më pak se 1% e aplikantëve morën përgjigje negative.
“Aplikantët që morën një përgjigje negative janë shtetas nga vende të tjera përveç Ukrainës”, tha shërbimi i imigracionit. Gjithkush ka të drejtë të punojë menjëherë pas regjistrimit të kërkesës për mbrojtje të përkohshme në Finlandë.
Sipas të dhënave të fundit të Komisionerit të Lartë të Kombeve të Bashkuara për Refugjatët, më shumë se 6.3 milionë refugjatë nga Ukraina janë regjistruar në Evropë.
Në kufi me Rusinë, Finlanda aplikoi për t’u anëtarësuar në NATO pasi Moska pushtoi Ukrainën. /tesheshi.com/
