Kryeministri Edi Rama publikoi sot kategoritë që përfitojnë shpërblim për festat e fundvitit. Ai tha se personat me ndihmë ekonomike përfitojnë 20 mijë lekë të vjetra, ndërsa 372 932 pensionistë, persona që marrin pension pleqërie, do të përfitojnë po 20 mijë lekë të vjetra.
“Ata që marrin pension kooperative bujqësore marrin 20 mijë lekë të vjetra dhe e njëjta shumë do të jepet për personat që marrin trajtim të veçantë për punën e kryer në miniera dhe disa ndërmarrje të industrisë ushtarake. 20 mijë lekë të vjetra do të jepen edhe për ata që marrin pension të parakohshëm për vjetërsi shërbimi”,- bëri me dije Rama.
Ndër të tjera kreu i qeverisë deklaroi se të gjithë nxënësit e shkëlqyer me 10 në arsimin parauniversitar do të marrin 500 mijë lekë të vjetra e të njëjtin shpërblim do të marrin edhe studentët e ekselencës.
Për grupin e mësuesve të spikatur Rama bëri me dije se do të marrin 400 mijë lekë. Ndër të tjera Rama informoi se 300 persona të dalluar në shërbimin spitalor, kryesisht infermierë por edhe në raste të veçanta mjekë, do të marrin 400 mijë lekë të vjetra.
Pas përfundimit të deklaratës në konferencën për shtyp, Kryeministri postoi edhe një status në Facebook, ku thumbon Partinë Demokratike “Shqup mos qaj për shpërblimet për të varfërit e pensionistët po kujtohu: 2010 shpërblime 0; 2011 prapë 0; 2012 (meqë vinin zgjedhjet) 2000L!”./tesheshi.com/
