Liria e medias u fitua më 5 janar 1991 me daljen në shtyp të numrit të parë të Rilindjes Demokratike, gazeta e parë pas 45 vitesh diktaturë, e pakontrolluar nga pushteti. Po çfarë ndodh sot pas 26 vitesh? Në vend që të kishim më shumë liri, në fakt kemi më shumë media, por më pak liri në media. Pushteti edhe në demkraci bëri çmos ta nënshtronte median dhe ta kthente atë në një propagandë të tij.
Dje erdhën ta nderonin atë ditë janari gazetarë, ata të orëve të para dhe të rinj, pronarë mediash dhe gazetarë të konvertuar në politikanë, por ata e dinë më mirë se kushdo se shumë pak ose aspak media janë të lira sot, secila prej tyre i shërben një interesi, atij të pronarit, që janë kryesisht biznesmenë të fuqishëm, atij të qeverisë për interesa financiare dhe favoresh, apo i shërbejnë opozitës në pritje të ardhjes së saj në pushtet. Mjaft të lexojmë raportet ndërkombëtare për lirinë e medias për të kuptuar në çfarë dite të zezë është sot kjo liri në Shqipërinë demokratike 26 vjet pas atij akti heroik të “fjalës së parë”.
Sot kemi gazetarë me vila që kushtojnë miliona dollar, kemi gazetarë që vetcensurohen nëçdo gërmë që shkruajnë, të mos prekin interest e pronarit, gazetarë që nuk guxojnë të bëjnë investigime apo tëzbulojnë skandale të pushtetit, por kemi shumë pak gazetarë të lirë që I shërbejnë publikut.
Basha kërkon aleancën e mediave
Në 26-vjetorin e Rilindjes Demokratike, kreu i opozitës Lulzim Basha foli për mungesën e lirisë së mediave, ndërsa krah tij rrinin pronarët e mediave që shërbejnëçdo pushteti dhe përfitojnë nga çdo pushtet, si Aleksandër Frangaj.
Ndërsa Frangaj ulte kokën, (ndoshta duke numëruar përfitimet që kishte kur ishte PD-ja në pushtet dhe atyre që ka sot me PS-në në pushtet), Basha kërkonte aleancë me median duke fajësuar qeverinë për korruptimin e tyre.
“Korrupsioni në sistem, krimi në sistem, klientelizmi në sistem, arroganca dhe arbitrariteti i skajshëm, janë sfidat dhe dorashkat që na ka hedhur të gjithëve në fytyrë pushteti i sotëm: opozitës, medias, shoqërisë civile, shoqërisë shqiptare. Opozita e refuzon këtë cinizëm ekstrem të qeverisë. Media lypset ta refuzojë dhe neverisë nga pozicioni i vet.Sonte do të doja të dalim nga pozicionet, e të afrojmë qëndrimet për disa çeshtje që nuk kanë ngjyrim politik, por janë standarde të etikës demokratike.Së pari, diversiteti i opinioneve si vlerë, por jo si burim mjegulle për të fshehur të vërtetat që janë çeshtje faktesh dhe shifrash konkrete”- u tha dje Basha përfaqësuesve të mediave.
Me kujdes Basha kishte zgjedhur t’u fliste mediave me një gjuhë të butë, duke lipsur që ato të viheshin në frontin e opozitës në shërbim të së vërtetës dhe të publikut, ndryshe nga gjuha që kundërshtari i tij në pushtet përdor ndaj atyre mediave që nuk zgjedhin t’i bëjnë fresk duke I quajtur “media të kazanit”.
Themeluesit e RD-së, historia e vështirë me lirinë
Në këtë përvjetor, RD-ja, e cila para 26 vitesh shitej nga 70 deri 100 mijë kopje dhe ishte ushqim për njerëzit që po prisnin ndryshimin e madh, sot i shërben vetëm propagandës së Partisë Demokratike. Por, pikërisht për atë fillim-janari të para 26 viteve ajo u dekorua nga Presidenti i Republikës me titullin “Kalorës i Urdhrit të Skënderbeut”. Disa prej themeluesve të saj të parë ishin aty, të tjerë mungonin. Ra në sy mungesa e kryeredaktorit më jetëgjatë të kësaj gazete, Astrit Patozit, i cili pak orë para festës në Hotel Plaza kishte postuar në facebook një dedikim për gazetën.
Drejtori i parë, Preç Zogaj dhe Kryeredaktori i parë i saj, Frrok Çupi ishin të pranishëm, madje dhe krah Sali Berishës, ish-kreut historik të PD-së me të cilin ata kanë pasur një marrëdhënie urrejtje-dashurie në këto 26 vite. Ishte i pranishëm Blendi Fevziu, por mungonte Ben Blushi, të dy këta kishin një shkrim me bashkë-autorësi në numrin e parë të gazetës. /tesheshi.com/
