Kreu i NISMA-s, Fatmir Limaj ka reaguar pas ngritjes së aktakuzës ndaj tij nga Prokuroria Speciale e Kosovës.
Ai thotë se aktakuza i është ngritur për një rast të cilin është hetuar së paku tri herë, dy herë nga UNMIK-u dhe një herë nga Tribunali i Hagës, dhe në të tri rastet për mungesë të provave hetimet janë mbyllur dhe thotë se kjo dëshmohet edhe nga shkresat hetimore të lëndës të cilat sot i mora nga prokuroria.
“Të vetmin arsyetim në të cilin prokuroria e mbështet aktakuzën është se vrasjet kanë ndodhur në territorin për të cilin prokuroria pretendon se në atë kohë ka qenë territor i brigadës 121 të UÇK-së. Edhe pse as vet prokuroria nuk e din kush janë vrasësit e atyre civilëve, ajo më bën mua përgjegjës pse nuk e paskam parandaluar apo ndaluar dhe pastaj hetuar vrasjen e dy civilëve për të cilët as në aktakuzë nuk dihet se kush janë vrasësit e atyre civilëve.
Shtrohet pyetja, si mund të bëhesh përgjegjës pse nuk kam parandaluar diçka për të cilën fare nuk kam qenë në dijeni se mund të ndodhë.
Gjithashtu në aktakuzë thuhet se nuk është bërë asgjë për t’u hetuar rasti. Nga shkresat e lëndës del se në atë kohë përgjegjësinë për këto vrasje përmes një komunikate e ka marrë përsipër Shtabi i Përgjithshëm i UÇK-së. Aty ka përfunduar kompetenca ime sepse unë në atë kohë nuk kam qenë anëtarë i Shtabit të Përgjithshëm të UÇK-së.
Nga kjo që thash më lartë del qartë se këtu nuk kemi të bëjmë më përpjeke për të ndriçuar rastin dhe fajtorët të marrin dënimin e merituar. Këtu është duke u keqpërdorur ky rast në mënyrë që të vazhdojë përndjekja kundër meje. Kjo besoj tanimë për të gjithë është e qartë. Familjarët e viktimave me të drejtë presin ndriçimin e rastit dhe zbulimin e fajtorëve dhe jo tragjedia e tyre familjare të shfrytëzohet për qëllime tjera”, thuhet në reagimin e Limajt.
Ndaj, aktakuzës së ngritur ndaj Limajt kanë reaguar edhe deputeti i NISMA-s Zafir Berisha ka reaguar duke thënë se ngritja e aktakuzës ndaj Limajt është pjellë e Serbisë, dhe deputetja e PDK-së Ganimete Musliu e cila ka shprehur keqardhjen e saj për rastin në fjalë.
Ndërsa, kryetarja e grupit paralamentar të NISMA-s Valdete Bajrami kërkoi nga deputetët që të mos debatohet për çështjen në fjalë nga deputetët, veprim që u quajt i mençur nga kryekuvendari Kadri Veseli. /tesheshi.com/
