Trashëgimtarët e Diego Maradonës do të nisin një proces gjyqësor në përpjekje për të ndaluar ankandin e Topit të Artë, të cilin futbollisti legjendar argjentinas e fitoi si lojtari më i mirë në Kupën e Botës 1986 në Meksikë.
Trofeu kishte humbur për dekada, por kohët e fundit është shfaqur dhe do të dalë në ankand në Paris në qershor, njoftoi shtëpia e ankandeve Agit javën e kaluar.
Maradona, i cili vdiq në vitin 2020 në moshën 60-vjeçare, fitoi trofeun për lojtarin më të mirë të Kupës së Botës në vitin 1986, ku udhëhoqi Argjentinën në një fitore 3-2 kundër Gjermanisë së atëhershme Perëndimore në finale.
Në atë turne, ai shënoi një gol të parregullt, por edhe “golin e shekullit” kur dribloi pothuajse të gjithë lojtarët kundërshtarë në fitoren 2:1 në çerekfinale kundër Anglisë.
Fati i panjohur i trofeut
Trashëgimtarët e Maradonës thonë se trofeu është vjedhur dhe pretendojnë se pronari aktual nuk ka të drejtë ta shesë atë, dhe avokati i tyre tha se do të kërkojnë një urdhër gjykate për konfiskimin e trofeut dhe për të paraqitur një kallëzim vjedhjeje.
Maradona e mori atë trofe në një ceremoni në Paris në 1986. Trofeu më vonë u zhduk dhe thashetheme të ndryshme qarkulluan për të.
Disa thanë se Maradona e humbi atë në një lojë pokeri ose e shiti për të shlyer borxhet, tha shtëpia e ankandeve.
Gjithashtu u përfol se Maradona e mbante atë në një bankë në Napoli, e cila u grabit nga gangsterët vendas në vitin 1989, ndërsa luante për Napolin.
Trashëgimtarët e Maradonës besojnë se është vjedhur nga një bankë. /tesheshi.com/
