Presidenti i Koresë së Jugut, Yoon Suk-yeol fali zv/presidentin e Samsung Electronics, Lee Jae-yong për të ndihmuar në tejkalimin e “krizës ekonomike kombëtare”, njoftoi Ministria e Drejtësisë e Koresë së Jugut.
Falja është kryesisht simbolike, pasi Lee tashmë është liruar me kusht pasi kreu 18 muaj burg për ofertë ryshfeti, ndërsa drejtonte prodhuesin më të madh në botë të telefonave inteligjentë dhe çipave të memories.
Ministri i Drejtësisë Han Dong-hoon tha, pasi Shin Dong-bin, kryetar i Lotte Group, konglomerati i pestë më i madh i biznesit në Korenë e Jugut, u fal gjithashtu, se qeveria, nga një nevojë urgjente për të kapërcyer krizën ekonomike kombëtare, fali “liderët ekonomikë të zgjedhur me kujdes që udhëheqin motorin e rritjes së vendit përmes investimeve aktive në teknologji dhe krijimit të vendeve të punës”, sipas Reuters.
Ish-Presidentja, pjesë e skandalit
Ju kujtojmë se trashëgimtari i perandorisë së biznesit Samsung Lee Jae-yong u dënua me burg në një rigjykim për korrupsion në janar 2021.
Gjykata e Lartë e Seulit dënoi Lee, zyrtarisht zv/president i Samsung Electronics, prodhuesi më i madh në botë i telefonave inteligjentë dhe çipave kompjuterikë, me 2.5 vjet burg.
Lee ka udhëhequr kompaninë për disa vite pasi babai i tij pësoi një atak në zemër dhe më pas vdiq në tetor 2020.
Në sfond të çështjes është skandali i korrupsionit që përfshin ish-presidenten e Koresë së Jugut Park Geun-hye.
Ai “ka dhënë në mënyrë aktive ryshfet dhe në mënyrë indirekte i kërkoi ish-presidentes të përdorte kompetencat e tij për të siguruar një transferim të qetë të pushtetit në krye të konglomeratit të biznesit”, shkruante gjykata në vendim. /tesheshi.com/
