Marrëveshja për rregullimin e saktë të statusit, si dhe anëtarësimi i Fakultetit të Studimeve Islame dhe i Fakultetit Teologjik Katolik në kuadër të Universitetit të Sarajevës, është nënshkruar sot nga kryeministri i kantonit të Sarajevës, Elmedin Konakoviq, nga kardinali Vinko Puljiç dhe nga Reis-ul-Ulema Husein Kavazoviq.
“Me këtë marrëveshje, Sarajeva dhe Bosnjë-Hercegovina po hyjnë në një program europian. Kjo vlerëson realitetin tonë, të vetëdijshëm për dallimet kulturore dhe fetare, dhe në këtë mënyrë ne po dëshmojmë se jemi të gatshëm të vlerësojmë dhe të respektojmë njëri-tjetrin në këtë diversitet,” tha kardinali Puljiç.
Fakultetet teologjike në Bosnjë-Hercegovinë kanë një histori të gjatë, dhe ato janë në njëfarë mënyre nismëtare të arsimit të lartë në vend, u tha gjatë nënshkrimit të marrëveshjes.
Reis-ul-Ulema Kavazoviq tha se shpreson që këto fakultete si edhe deri më tani do të kenë funksion humanist dhe do të zhvillojnë tek të rinjtë ndjenjën e së drejtës dhe përgjegjësisë. Ai tha gjithashtu se pret që Universiteti i Sarajevës së shpejti në punën e tij të përfshijë edhe fakultetin e tretë teologjik, atë ortodoks, i cili edhe më parë ka ekzistuar në Sarajevë.
Sipas kryeministrit Konakoviq, barazia e fakulteteve teologjike brenda komunitetit akademik është shumë e rëndësishme. Ai u shpreh se ato janë lënë pas dore dhe janë margjinalizuar deri më tani, çka ua ka vështirësuar punën, ngaqë nuk janë financuar nga kantoni i Sarajevës.
“Fakulteti i Studimeve Islame dhe Fakulteti Teologjik Katolik janë anëtarë të barabartë të Universitetit të Sarajevës; dekanët e tyre janë anëtarë të Senatit dhe financohen nga kësti 66.5 milionë KM (marka të konvertueshme),” ka thënë kryeministri Konakoviq, i cili falënderoi komunitetin akademik në kantonin e Sarajevës dhe dekanin e fakultetit, që kamë shprehur vullnetin të heqin dorë nga një pjesë e këstit të tyre për t’i financuar këto dy fakultete.
Rektori i Universitetit të Sarajevës, Rifat Skrijelj, tha se universiteti ka qenë këmbëngulës në përpjekjet e tij për ta pasuruar anëtarësinë me dy fakultete teologjike, duke shtuar se është lënë mundësia për bashkimin edhe me kolegjin ortodoks nëse e dëshirojnë këtë.
“Për një kohë të gjatë ka dominuar mendimi në shoqërinë tonë se feja nuk i duhet universitetit, ndërkohë që në universitetet më prestigjioze europiane dhe botërore fakultetet teologjike janë anëtare të tyre për një kohë të gjatë tashmë,” nënvizoi ai. /tesheshi.com/
