Një gol i mbrojtësit Brad Smith në minutën e 73-të i ka dhënë mundësi Liverpool-it ta zhvillojë edhe duelin kthyes pas barazimit 2-2 në raundin e tretë të FA Cup-it ndaj Exeter City-t, që vjen nga liga e katërt e futbollit anglez.
Eksperimenti i trajnerit gjerman Jurgen Klopp me rotacionin në skuadër fare lehtë mund të dështonte ndërsa futbollistët vendas befasuan qysh në fillimin e ndeshjes, kur realizuan përmes Tom Nichols-it në minutën e 9-të. Nuk vonoi shumë reagimi i të kuqve, që tre minuta më pas i barazuan shifrat me anë të sulmuesit të ri Jerome Sinclar.
Një gol në fundin e pjesës së parë ka ringjallur entuziazmin e skuadrës modeste të Exeter City-t. Goditja nga këndi, e ekzekutuar në mënyrë të mrekullueshme nga Lee Holmes, ka përfunduar në rrjetën e gardianit Adam Bogdan.
Liverpool-in e shpëtoi nga eliminimi mbrojtësi Brad Smith, i cili shënoi 17 minuta para përfundimit të ndeshjes. Kështu, në “Anfield” do të luhet një tjetër takim për të përcaktuar skuadrën që do të vazhdojë garën, me mundësitë më të mëdha që këtë ta bëjë Liverpool-i, edhe pse surprizat janë gjithmonë të pranishme në këtë aktivitet. /tesheshi.com/
