Kryeministri shqiptar Edi Rama ka dërguar trupa për të pastruar bregdetin përpara sezonit të pasur turistik të pritshëm, shkruan Euractiv me qendër në Bruksel, duke shtuar se Shqipëria ka ende probleme me depozitimin e mbetjeve, sepse grumbullimi komunal është sporadik dhe nuk ka objekte riciklimi.
Duke pritur që pas dy vitesh pasigurie për pandeminë COVID-19 në 2022, turizmi shqiptar do të jetë në gjendje të kompensojë humbjet, Rama vizitoi dje zonat turistike dhe paralajmëroi se një numër i madh turistësh do të sillnin mbetje shtesë këtë vit.
Ai shtoi se ushtria është dërguar në disa zona bregdetare, por se i takon popullatës që të mbajë bregdetin të pastër.
“Do të jetë sezoni më i pastër për shkak të punës së jashtëzakonshme që bëhet çdo ditë, por edhe për instrumentet financiare që u vijnë në ndihmë bashkive bregdetare ku popullsia rritet gjatë sezonit. Nëse bashkitë janë të pastra, është detyrë e njerëzve që të mos ndotin”, tha ai.
“Elementi i parë i patriotizmit është të mos ndotësh shtëpinë tonë të përbashkët”, shtoi Rama.
Ministrja e Turizmit dhe Mjedisit, Mirela Kumbaro tha se 61 bashki kanë ndarë fonde shtesë për menaxhimin e mbetjeve, por më e rëndësishmja është ndryshimi i mentalitetit të njerëzve.
Vlerësohet se sfida më e madhe për Shqipërinë është çfarë të bëjë me mbetjet. Koshat e mbeturinave mungojnë në shumë zona dhe kontejnerët në të cilët hidhen mbeturinat
komunale ndonjëherë janë plot me ditë të tëra. Përveç kësaj, vetëm 86 për qind e popullsisë mbulohet nga shërbimet e menaxhimit të mbetjeve.
Aktualisht nuk ka objekte riciklimi në pronësi të shtetit në Shqipëri. Të gjitha mbetjet ose hidhen nga qytetarët, ose mblidhen nga bashkitë dhe hidhen në deponi, ndërsa një sasi e vogël digjen.
Gjatë vitit 2020 janë gjeneruar 1.04 milionë ton mbetje dhe mbi 80 për qind janë hedhur në landfill. Në të njëjtin vit, vetëm 18 për qind e atyre mbeturinave u ricikluan, që është më pak se një vit më parë, sipas Euroactiv.
Kreu i Shoqatës së Ricikluesve, Bardhyl Balteza, tha dy vite më parë se industria e riciklimit do të falimentonte për shkak të mungesës së mbështetjes nga shteti. Sektori aktualisht funksionon me vetëm 15-30 përqind të kapacitetit dhe do të detyrojë kompanitë e riciklimit të largohen nga vendi, shtoi ai.
Por, duke qenë se numri i turistëve tashmë duket premtues për vitin 2022, do të duhet gjetur një zgjidhje për mbetjet. Shifrat e muajit mars tregojnë se numri i vizitorëve në
Shqipëri u rrit me mbi 53 për qind krahasuar me të njëjtin muaj të vitit 2021, megjithëse ka shqetësime se pasojat e luftës në Ukrainë mund të kenë ndikim në sektorin e turizmit.
Sipas Institutit Kombëtar të Statistikave, Shqipëria ka pritur 363,483 turistë nga Evropa Lindore në vitin 2021. Në kulmin e tij, në vitin 2019, ky numër ishte 393,368, dhe shumica e vizitorëve ishin nga Polonia, Ukraina, Rusia dhe Bjellorusia. /tesheshi.com/
