Kryebashkiaku i Tiranës, Erjon Veliaj, ka shpjeguar projektet që do të shndërrojnë me pamje krejt të re “Zogun e Zi” dhe sheshin “Shqiponja”.
Rrethrrotulli i Zogut të Zi referuar projektit të Bashkisë së Tiranës do të ketë shatërvanë funksionalë, lulishte dhe pemë.
“Vjet përfunduam hyrjen e Tiranës, Rr. “Dritan Hoxha”, e cila do të vazhdojë të sistemohet edhe këtë vit. Megjithatë, kjo është vetëm një ndërhyrje estetike. Këtu ka ekzistuar një pellg bretkosash, por kjo s’mund të ishte hyrja e Tiranës. Projekti i ri parashikon një minipark, me një hapësirë qendrore për vendosjen e instalacioneve të ndryshme artistike, të cilat do të ndërrohen sipas stinëve. Ndërkohë, pjesa tjetër do të ketë disa hapësira me shatërvanë, ku do të mbjellim edhe bimësi shumë stinore, në mënyrë që edhe hyrja e Tiranës të ketë të njëjtin dinjitet si sheshi ‘Skënderbej’”, tha Veliaj.
Ndërhyrja e rradhës, pas përfundimit të projektit te Zogu i Zi, do të prekë fasadat e pallateve përreth, në mënyrë që Tirana të krijojë një përshtypje sa më pozitive për këdo që viziton kryeqytetin.
“Pavarësisht fuqisë ekonomike të Tiranës, do të kujdesemi që shtëpia jonë të duket sa më dinjitoze që në hyrje. Kjo do të përfshijë edhe disa ndërhyrje në fasadë. Do të ketë një pastrim fasadash nga reklamat, posterat dhe mbishkrimet e tepërta që janë ndotje estetike. Në disa kemi ndërhyrë me grafit apo me vendosjen e sistemeve të reklamave dixhitale, por unë besoj që e ka mundësinë të jetë një mini “Time Square” i rrethuar me reklama dixhitale, një qendër e cila do të jetë gjithashtu e vizitueshme”, u shpreh ai.
Kryebashkiaku Veliaj deklaroi se një nga projektet e ardhshme do të jetë ndërtimi i nënkalimit te sheshi “Shqiponja”, që do të zgjidhë përfundimisht problemin e trafikut në këtë zonë tepër të rëndësishme.
“Fillimisht do të fillojmë me nënkalimin te sheshi “Shqiponja”, aty e kemi edhe nyjën më të madhe problematike dhe për sa kohë që zgjidhim atë, duke e integruar me Unazën e Madhe të Tiranës, do të shikojmë sesi do të sillet trafiku për t’i dhënë një zgjidhje afatgjatë edhe Zogut të Zi. Por, teksa mendojmë për një zgjidhje afatgjatë, është shumë e rëndësishme edhe estetika dhe funksionaliteti i kësaj që kemi. Ndaj mezi pres që në një kohë rekord, për pak javë, të kemi një hyrje të Tiranës që është po aq dinjitoze sa hyrja e çdo shtëpie të qytetarëve të Tiranës”, theksoi Veliaj. /tesheshi.com/
