Presidenti egjiptian, Abdulfettah es-Sisi, do të vizitojë muajin e ardhshëm Gjermaninë, por duket se vizita e tij po merr të krisurat e para.
Kreu i parlamentit gjerman, Norbert Lammert, ka njoftuar anulimin e një takimi të planifikuar me presidentin egjiptian gjatë vizitës që ky i fundit do të bëjë në qershor në Berlin.
Në njoftimin e zyrës së Lammert-it thuhet mes të tjerash se, “… çfarë po shohim në muajt e fundit është persekutimi sistematik i grupeve opozitare, janë arrestimet masive, dënimet e gjata me burg, dhe një numër i jashtëzakonshëm dënimesh me vdekje … Duke patur parasysh situatën, e cila nuk i kontribuon as paqes në vend, e as demokratizimit të vendit, Lammert nuk sheh arsye për momentin për një takim me presidentin es-Sisi.”
Kundërshti ndaj vizitës së es-Sisit në Gjermani janë dëgjuar dhe nga zëra të tjerë të politikës gjermane. Kështu, Franziska Brantner, përfaqësuese e të Gjelbërve në parlament, ka kërkuar anulimin e vizitës së presidentit egjiptian, të paraparë për më 3 qershor.
Në faqen e saj elektronike, ajo ka shkruar, “Dënimi me vdekje i dhënë për Mursin është një tjetër provë e arbitraritetit gjyqësor në Egjipt, dhe tregon se parimet fundamentale të sundimit të ligjit po nëpërkëmben.”
Një kërkesë për anulimin e vizitës së es-Sisit i është bërë qeverisë gjermane dhe nga Këshilli Revolucionar Egjiptian, që e fton atë të marrë në konsideratë dhunimin e të drejtave njerëzore nga presidenti egjiptian, kufizimin prej tij të lirive civile, dhe dënimet masive me vdekje.
Dënimi kapital i dhënë në fundin e javës së shkuar për ish-presidentin Muhammed Mursi po nis të kritikohet ashpër nga një pjesë e bashkësisë ndërkombëtare, edhe pse disi me vonesë. Reagimi më kundërvënës ndaj vendimit ka ardhur nga zyrtarët e lartë turq, për t’u pasuar më pas dhe nga të tjerë, sido që me tone më të zbutura.
Es-Sisi ka ndjekur një politikë shtypëse që me ardhjen e tij në pushtet pas një grushti shteti, posaçërisht ndaj Vëllazërisë Muslimane. Gjykatat kanë dhënë qindra dënime me vdekje, që kulmuan me një të tillë për ish-presidentin Mursi. /tesheshi.com/
