Koreja e Veriut paralajmëroi Shtetet e Bashkuar të mos ndërmarrin veprime provokative në rajon, pasi kundërpërgjigja do të jetë me sulm bërthamor. Këto komente vijnë në një kohë kur vendi feston 105-vjetorin e lindjes së presidentit themelues, Kim Il-sung.
Ushtarë, tanke dhe të tjera mjete ushtarake parakaluan në Penian, në një shfaqje të fuqisë, e cila ka ngjallur spekulime se lideri aktual, Kim Jong-un, mund të urdhërojë një tjetër test nuklear. Edhe zyrtarë të ushtrisë koreano-veriore paralajmërojnë se vendi është i përgatitur t’i përgjigjet luftës me luftë.
Në ekspozim për herë të parë, ishin edhe raketa balistike nënujore. Mes shqetësimeve se shteti po i përafrohet prodhimit të suksesshëm të një arsenali nuklear, parada ishte një mundësi që lideri Kim Jong-un të shfaqte kapacitetet aktuale ushtarake.
Koreano-veriorët vijojnë të shpërfillin presionin në rritje nga Shtetet e Bashkuara për të braktisur këtë program të armëve bërthamore. Ndërkohë, Kina, e vetmja aleate e Koresë së Veriut, i trembet një konflikti të mundshëm që mund të çojë edhe në rrëzimin e regjimit dhe në probleme kufitare. /tesheshi.com/
