Presidenti Erdogan ka thënë se është shumë e dhimbshme që bota islame sot më shumë përmendet për shkak të mosmarrëveshjeve sesa bashkimit, konfliktit sesa paqes, dhe shtoi se luftërat civile, grindjet vëllavrasëse dhe politika e nënshtrimit çdo ditë e më shumë po e përçan botën islame.
Në Pallatin Presidencial në Ankara, me organizimin e Këshillit për Arsimim të Lartë në botën islame, në fjalën e tij të hapjes para pjesëmarrësve, presidenti turk kujtoi një thënie, se “e vërteta lind gjatë përplasjes së ideve”, dhe shtoi se universitetet dhe komunitetet akademike janë vendet më adekuate për këtë.
“Në thelb të qytetërimit islam janë vëllazëria dhe solidariteti, si tullat nga të cilat ndërtohet muri. Nisur nga ky aspekt, në procesin e afrimit të ndërsjellë, dallimet tona politike, medh’hebore dhe etnike duhet të jenë pasuria dhe mundësia jonë më e madhe, e kurrsesi të jenë shkaktarë të problemeve”, ka thënë Erdogan.
Duke theksuar se muslimanët janë vëllezër në fe dhe se kurrsesi nuk duhet lejuar që kufijtë e tyre të jenë linja të divergjencës, Erdogan tha se është e trishtë se si tre vendet e Gjirit aktualisht ndodhen në një krizë të tillë.
Erdogan tha se të gjitha problemet mund të tejkalohen përmes dialogut, dhe se është e papranueshme që ndonjëri nga vëllezërit të përndiqet në qoshe.
“Më shumë se kurrë më parë, bota myslimane ka nevojë për solidaritet dhe vëllazëri. Aktualisht këtë tubim para meje e shoh si bazë për një gjendje të tillë, por edhe kjo duhet të ketë konstanten e saj”, tha Erdogan, duke përmendur shumë shembuj të palogjikshëm si Siria dhe Iraku, ku muslimanët vrasin muslimanët dhe atë me britma për njëshmërinë e Zotit.
Duke theksuar se Jerusalemi është një simbol i paqes dhe se aty po mbrohet karakteri i Islamit, Erdogan ka thënë se çdo ditë Izraeli ndërmerr masa të reja dhe sulme ndaj muslimanëve dhe simboleve islame, dhe se këtë e bën i inkurajuar nga dobësia aktuale dhe ndasitë në mes të muslimanëve.
“Veprimi nga ana e qeverisë izraelite për heqjen e detektorëve nga portat e Al-Aksa që ka fyer myslimanët, është një veprim në drejtimin e duhur, por jo e mjaftueshme”, ka theksuar në fund Erdogan. /tesheshi.com/
