Nga Blendi Gashi
Zyrtarisht në Kosovë ende është larg fillimi i fushatës parazgjedhore për zgjedhjet lokale që do mbahen në vjeshtë, por partitë kanë nisur në heshtje tashmë fushatën për zgjedhjet parlamentare që sipas kalendarit zgjedhor do duhej të mbaheshin pas një viti, e që duke parë krizën mes partnerëve të koalicionit PDK-LDK, ato pritet të trokasin në çdo moment.
Dhe sa herë që vjen era zgjedhje, partitë në pushtet premtojnë kryesisht rritje pagash, me qëllimin e vetëm të përfitojnë vota. Një model të tillë para zgjedhjeve në vitet e fundit e ka ndjekur ish-kryeministri Thaçi, i cili kritikohej jashtëzakonisht shumë nga LDK-ja atë kohë parti opozitare, por jo vetëm.
Dhe tani çuditërisht rrugën e Thaçit tani po e ndjek kryeministri aktual Mustafa, njëherit kreu i LDK-së, i cili sot paprimtas ka paralajmëruar rritje të pagave për shërbyesit civilë, për punëtorët e arsimit dhe ata të shëndetësisë.
“Javën e kaluar kemi aprovuar informatën lidhur me ecuritë e buxhetit dhe për kornizat për vitet e ardhshme. Kemi konstatuar se kemi një qëndrueshmëri të mirë buxhetore gjatë kësaj periudhe, kemi lëvizje të mira ekonomike. Tash, në suaza të kësaj unë dëshiroj të kërkoj nga Ministria e Financave që në mbledhjet e ardhshme, prapë në koordinim me FMN-në, të propozojë edhe mundësinë e rritjes së pagave për shërbyesit civil dhe njerëzit tjerë që punojnë në arsim dhe në shëndetësi, në gjysmën e këtij viti, në mënyrë që të përgatitemi edhe gjatë rishikimit të buxhetit t’i kemi këto komponente dhe pastaj të zbatojmë në të ardhmen në mënyrë automatike rritjen e pagave sipas rritjes ekonomike”, tha kryeministri, në mbledhjen e sotme të qeverisë.
Nuk ka fije dyshimi se ky premtim i Mustafës vjen pas zëra tashmë në rritje për prishje të koalicionit nga PDK-ja e Veselit dhe duke parë se zgjedhjet e parakohshme veçse kanë trokitur.
Dhe përmes këtij premtimi, kreu i LDK-së, mundohet të përfitojë elektorat sa më shumë në zgjedhjet e reja duke parë se sondazhet partinë e tij e kanë nxjerrë si parti të tretë në vend.
Por shtrohet pyetja, se a do i sjell ky premtim vota më shumë LDK-së së tij, apo thjesht nuk do ndikojë fare në elektorat?
Dihet mirë se premtimet e bëra nga Thaçi në vitin 2010 për rritje të pagave për 50 % dhe në 2014-tën rritje 100 për qind, nga 25 për qind çdo vit, dolën të suksesshme për të dhe PDK-në, pasi morën pushtetin, gjë që mbetet të shihet nëse do ketë efekt edhe tek Mustafa dhe LDK.
Kur LDK kritikonte ashpër Thaçin për premtimet për rritje pagash
Pikërisht LDK ishte partia më e ashpër pas premtimeve të Thaçit për rritje pagash, duke i quajtur në vazhdimësi mashtrime elektorale.
Në muajin nëntor, në një konferencë për media i ashtuquajturi Këshilli i Ekspertëve për ekonomi i LDK-së i udhëhequr atë kohë nga Avdullah Hoti (ministër aktual i Financave) dhe Hykmete Bajrami (ministre aktuale e Tregtisë), premtimet e Thaçit i quante mashtrime elektroale, duke thënë se buxheti për vitin 2014 konfirmon një gjë të tillë.
Hoti, atë kohë potencoi dy mashtrime të Thaçit.
Sipas Hotit, mashtrimi i parë ka të bëjë me premtimet për rritje të pagave.
“Thaçi ka premtuar rritje të pagave 100%, ndërsa në buxhetin që e ka miratuar vetë, kjo rritje është vetëm 7%. Bazuar në buxhetin për 2014, shuma për paga nga 435 milionë sa ka qenë këtë vit, në 484 milionë euro për vitin 2014, që është një rritje vetëm 48 milionë euro”, theksoi Hoti.
Mashtrimi i dytë i kryeministrit Thaçi, sipas Hotit, ka të bëjë me investimet kapitale nëpër komuna.
Mbetet të shihet nëse edhe premtimet e Mustafës do jenë premtime boshe të tij që asnjëherë nuk do realizohen, por vetëm po bëhen sa për të fituar ca vota më shumë në zgjedhjet e reja kurdo që mbahen ato. /tesheshi.com/
