Qeveria e Kosovës, pas shumë diskutimeve dhe kritikave, ka miratuar më 30 tetor projektbuxhetin prej 1 miliard e 590 milionë eurosh.
Miratimi i buxhetit duhet të bëhet edhe në Kuvend, por kjo duket vështirë e realizueshme kur opozita po e mban atë të bllokuar.
Mazhoranca beson se seanca do të mbahet këtë muaj, dhe e ka ftuar opozitën që të marrë pjesë, por kjo e fundit është e mendimit se nuk duhet të thirret seancë e re.
Ministri i Financave, Avdullah Hoti, ka deklaruar se projektbuxheti për vitin 2016 nuk është një 
dokument politik, e se ai do të reflektojë në jetën e të gjithë qytetarëve, andaj opozita duhet të jetë e pranishme në sallë.
“Unë besoj se gjatë muajit nëntor do të aprovohet në Kuvend. Ne kemi obligim ligjor si qeveri që brenda datës 31 tetor ta dorëzojmë në Parlament, gjë të cilën e kemi bërë. Unë besoj se shpejt projektbuxheti do të shqyrtohet në komisionet parlamentare, dhe që andej do të kalojë në seancë. Eshtë çështja më e rëndësishme gjatë vitit që diskutohet në Kuvend, dhe unë besoj se edhe opozita duhet të jetë e vetëdijshme për rëndësinë që ka buxheti për jetën e secilit qytetar. Pra, po flasim për një dokument që nuk është vetëm politik, nuk është si çdo ligj tjetër. Eshtë ligji që përcakton zbatimin e çdo ligji tjetër, dhe prek jetën e secilit qytetar. Nëse ky buxhet nuk aprovohet, kjo na shkakton shumë problem,” tha Hoti.
VV: S’duhet të thirret seancë e re
Deputetja e VV-së, Albulena Haxhiu, ka thënë për portalin tesheshi.com se nuk do të duhej të kishte seanca të tjera parlamentare pas seancës të së premtes.
“Madje kjo ka qenë kërkesa jonë si opozitë që nga fillimi. Meqë rrethanat nuk kanë ndryshuar (nuk ka tërheqje nga marrëveshjet), kryesia e Kuvendit nuk duhet të thërrasë seanca të reja, as për buxhetin. Eshtë momenti i fundit që Kuvendi të mbrohet nga abuzimet e qeverisë,” ka deklaruar Haxhiu.
AAK ende pa qëndrim
MuharremNitaj, zëdhënësi i AAK-së ka thënë për tesheshi.com se ende nuk kanë një qëndrim nëse do të 
marrin pjesë në një seancë ku pikë e vetme e rendit të ditës do të ishte votimi i buxhetit për vitin e ardhshëm.
“Departamenti i partisë për ekonominë është duke e parë projektbuxhetin, dhe do të marrë një qëndrim për përmbajtjen e tij pasi ta analizojë. Më tutje vendoset hapi i deputetëve të AAK-së, nëse do të marrin pjesë në seancë. Tani për tani nuk ka qëndrim,” ka deklaruar Nitaj. /tesheshi.com/
