Ndërkohë që në Shqipëri hasim rëndom persona që punojnë në të zezë, David Cameron thotë që nuk ka ndërmend të dorëzohet në luftën kundër emigracionit të paligjshëm në Mbretërinë e Bashkuar, pavarësisht se shifrat zyrtare tregojnë se që prej vitit të kaluar, numri i personave që kanë hyrë ilegalisht në vend është rritur me 50%.
Në vitin 2014 u futën në Mbretërinë e Bashkuar 641000 vetë, nga shtetet brenda BE-së dhe jashtë saj, por sipas Cameron deri tani qeveria konservatore ishte frenuar nga liberal demokratët për të ndërmarrë masa për ndalimin e emigracionit të paligjshëm, ndërsa pas fitores absolute në zgjedhjet e fillim muajit, nuk e ka më këtë problem.
“Vend i fortë nuk është ai që hap dyert, por ai që kontrollon si duhet emigracionin. E vërteta është se ka qenë shumë e lehtë për njerëzit të jetojnë dhe punojnë këtu në mënyrë të paligjshme. Kështu që do të ndërmarrim një hap radikal: do ta bëjmë punën në të zezë vepër penale, ndërsa rrogat e punëtorëve në të zezë do të sekuestrohen”,- ka thënë Cameron.
Kjo nismë pritet të dekurajojë qëndrimin në vend të emigrantëve të paligjshëm, por edhe atyre që kanë ardhur legalisht dhe punojnë në shkelje të kodit të punës.
Të njëjtat sanksione do të zbatohen edhe për emigrantët që kanë tejkaluar lejen e tyre të qëndrimit.
Gjithashtu, Cameron synon të bëjë të mundur përfitimin e ndihmës sociale ndaj emigrantëve vetëm pas katër vitesh qëndrimi në vend, ndërsa do të përballet me vendet e Bashkimit Europian pasi kërkon të ketë mundësinë të deportojë shtetasit e unionit nëse nuk arrijnë të gjejnë një vend pune për gjashtë muaj. /tesheshi.com/
