Partia Demokratike mbajti në Pallatin e Kongreseve takimin e hapjes zyrtare të fushatës elektorale, ku të pranishëm, veç drejtuesve më të lartë të demokratëve, janë edhe 61 kandidatët për kryetarë bashkie në të gjithë vendin dhe kryetarë të partive aleate në koalicionin opozitar.
Opozita beson se oferta e saj për uljen e taksave, punësimi, mirëqënie, dhe dinjitetin, së bashku me kandidatët, është oferta më e mirë për zgjedhësit më 21 Qershor.
“Ulja e taksave është kryefjalë e ofertës sonë për zgjedhjet vendore. Të gjithë kandidatët tanë janë betuar për uljen deri më 30 për qind, sa lejon ligji të taksave, janë zotuar për nxitjen e investimeve dhe hapjen e vendeve të punës, përkujdesje për qytetarët dhe familjet në nevojë, për ata që janë harruar dhe goditur më rëndë arbitrarisht nga dyshja Rama-Meta, e që sot po marrin pa shpresë arratinë nga shtëpitë. Oferta jonë është për nxitjen e sipërmarrjes dh nxitjes së investimeve”- deklaroi kreu i Partisë Demokratike, Lulzim Basha.
Basha tha se PD është partia e shpenzimeve publike që përballë ka kandidatët e dyshes Rama-Meta, të cilët sipas kreu të opozitës, njësoj si Rama-Meta do të shpenzojnë fondet për fasada.
“Oferta jonë është demokracia pjesëmarrëse dhe decentralizimi i mëtejshëm, oferta jonë janë kandidatët tanë më të mirë, individë të suksesshëm në punë, profesione, njerëz të nderuar dhe të respektuar nga qytetarët, menaxherë të aftë, të përkushtuar dhe me përvojë të madhe, drejtues të spikatur, të gjithë të gatshëm për të marrë përgjegjësinë dhe për të vënë në zbatim ofertën tonë të punësimit, mirëqenies, dinjitetit”- shtoi Basha.
Fjalën e hapjes e mbajti Sekretari i Përgjithshëm, Arben Ristani, i cili i qëndroi linjës së demokratëve, të bërë të njohur edhe në takimet prezantuese të kandidatëve nga ana e Lulzim Bashës, duke folur për punësimin, taksat, varfërinë dhe politika të tjera, që nuk varen thellësisht nga politikat e pushtetit lokal.
Më pas fjalën e mori kryetari i Partisë Republikane, Fatmir Mediu. Edhe kreu i republikanëve foli për rritje të papunësisë dhe këtu përmendi edhe një deklaratë të kryeministrit Edi Rama.
“Kryeministri e ka gjetur përgjigjien për rritjen e papunësisë, dhe sipas tij shkak është rritja e kërkesës së njerëzve për të kërkuar punë në zyrat e hapura nga Erioni”- tha Mediu.
Pas kësaj, në foltore dolën me rradhë e kandidatët e opozitës për bashkitë më të mëdha të vendit. /tesheshi.com/
