Tirana zyrtare është shndërruar tashmë në dhënëse të leksioneve morale pas marrjes së 20 emigrantëve eritreas nga Italia, si një formë kontributi në krizën e Unionit.
Duke folur për BBC-në, ministri i Jashtëm Ditmir Bushati, pasi sqaroi dhe njëherë arsyen, sipas tij në kujtesë dhe mirënjohje për atë që Italia kishte bërë ndaj shqiptarëve dekada me parë, përcolli kritika ndaj ca vendeve të Lindjes në qasjen ndaj emigrantëve, ku nuk është e vështirë të kuptohet se bëhet fjalë për Hungarinë e Orbanit.
“Fatkeqësisht, e kemi parë Evropën të përçarë. Kemi parë vende jo vetëm në veri të Europës, por edhe në lindje, të cilat e kanë harruar historinë e tyre. Unë mund të kujtoj çastet e rënies së Murit të Berlinit, por edhe gjatë komunizmit ka pasur shumë njerëz nga ana lindore që i largoheshin komunizmit dhe shkonin në perëndim. Mendoj se është një mesazh edhe për BE-në, që na duhet një pikëpamje më koherente, një përgjigje më koherente për çështje kaq të rëndësishme. Edhe nga perspektiva e vendeve kandidate, siç është Shqipëria”, deklaroi kreu i diplomacisë së Tiranës. /tesheshi.com/
