“Na ishte një herë që kurrë mos qoftë”. Ky është emri i ekspozitës që u hap në Prishtinë për të kujtuar 1133 fëmijë të vrarë gjatë periudhës 1999-2000. E organizuar nga Fondi për të drejtën humanitare, ekspozita tregoi fakte të padëgjuara, dhe pamje të pa ekspozuara më parë.
Para 20 vitesh, shtatë anëtarë të familjes Duriqi nga Podujeva ishin ekzekutuar në qendër të qytetit. Ndërsa sot, dy dekada më pas, Enver Duriqi e ri rrëfen tragjedinë e familjes së tij që ndodhi në muajin mars të vitit 1999.
Enver Duriqi. Foto: Valon Fana.
Aty, Enveri humbi dy prindërit, gruan, dy vajza dhe dy djem, të moshave 21 muaj deri 9 vjeç.
Duke mbajtur në dorë librezën e shkollës së të birit, ai fshin lotët.
Familja e tij kishte kërkuar një strehë të sigurt në qytet, për t’u shpëtuar sulmeve të forcave serbe në fshatrat e Podujevës. Ata ishin së bashku me familjen Bogujevci, të cilët humbën 16 anëtarë të familjes.
Ao kohe, Duriqi ishte pjesëtarë i UCK-së dhe tani është invalid i luftës,
Ai shprehet i pakënaqur me punën që ka bërë vendi për të denoncuar krimet e luftës.
Foto: Valon Fana
Në ekspozitën e mbajtur në ambientet e bibliotekës “Hivzi Sylejmani” janë të vendosura fletore, libra, libreza, kartolina, çanta shkollore, këpucë dhe rroba të fëmijëve të vrarë në këtë periudhë. Ka pasur pak vëmendje fakti se nga 10.000 të vrarë, më shumë se 1000 kanë qenë fëmijë.
Mejreme Kelmendi. Foto: Valon Fana.
Mejreme Kelmendi, një tjetër prind që iu vranë fëmijët, erdhi nga Gjakova për të parë ekspozitën. Ishte e dhimbshme pasi ajo mbante mend detajet e vdekjes së dy djemve të saj, Besim dhe Haxhi, të cilët ishin 12 dhe 10 vjeç. “Në këtë ekspozitë shoh fotografinë me batanijen me të cilën i mbulova fëmijët,” kujton ajo.
“Do të doja që ata plumba të më kapnin mua dhe jo fëmijët e mi … kështu që nuk do të shihja këtu fotot e tyre,” thotë ajo me dëshpërim.
Ashtu si Enver Duriqi, edhe Mejreme Kelmendi është tejet e zhgënjyer me trajtimin e krimeve të luftës nga institucionet kosovare dhe shpreson se do të ketë më shumë angazhim për të sjellë drejtësi në të ardhmen.
“Ne kemi shumë dhimbje, megjithatë na duhet pak guxim… jemi aq të lodhur”, tha ajo.
Ekspozita e hapur për vizitorët në bibliotekën “Hivzi Sylejmani” në lagjen Dardania të Prishtinës do të qëndroj e hapur deri në Maj të vitit 2020. /tesheshi.com/
