Në protestën e sotme para parlamentit shqiptar kundër projektligjit për riciklimit të mbetjeve, ndryshe “ardhjes së plehrave”, u shfaq tejet aktiv edhe ish-deputeti i LSI-së, tashmë jashtë politikës zyrtare por me aksione të forta gjysëmpolitike, Nikollaq Neranxi.
Biznesmemi i njohur i frutave të thata, i cili është shfaqur si “armik i qeverisë” në disa episode, duke qenë njëherësh dhe “viktimë” e krimit nën këtë qeveri pas grabitjes që iu bë arkës së kompanisë së tij ditën për diell, kohët e fundit është angazhuar fuqimisht edhe kundër projektit të rilindjes urbane të Himarës, pas së cilës, ai dhe një pjesë e komunitetit himarjot shohin thjesht projektin e grabitjes së pronave.
Dhe sot, ai i investua personalisht në protestat kundër projekligjit të plehrave, duke sjellë një kazan real plehrash, me misionin simbolik të futjes aty të atyre qeveritarëve që sipas tij po duan ta mbysin këtë vend me plehrat e ardhura nga bota.
Kjo është hera e parë që Neranxi shfaqet kaq i angazhuar si personazh i shoqërisë civile. /tesheshi.com/
