Partia Demokratike është e vendosur në objektivin kryesor të saj, që në zgjedhjet e ardhshme të mundësohet votimi elektronik.
Kështu shprehet kreu i grupit parlamentar të PD-së, Edmond Spaho, sipas të cilit puna për reformën zgjedhore duhet të fillojë sa më parë, në mënyrë që qytetarëve t’u mundësohet vota e lirë.
“Objektivi ynë është t’i japim qytetarëve shqiptarë zgjedhje të lira e të ndershme. Në përgjithësi zgjedhjet në Shqipëri, 2013, 2015, 2017, kanë patur probleme thelbësore, veçanërisht shitblerja e votës. Këto probleme do të evidentohet edhe në raportin e OSBE/ODIHR për zgjedhjet e 2017. Kur themi që duhet të kryhet reforma zgjedhore, përveç votimit elektronik, evitimit të shitblerjes së votës, është e rëndësishme që t’u mundësohet qytetarëve një sistem zgjedhor i ndershëm. Ndaj synohet të kalohet në një sistem të ri zgjedhor, i cili do të mundësojë të zgjedhurve dhe zgjedhësve votë dhe garë të ndershme”, shprehet Spaho për News 24.
Në vijim ai shprehet se për aplikimin e votimit elektronik kërkohet vullnet politik. Sipas tij, ky lloj votimi do të mund të identifikojë votuesve, duke shmangur në këtë mënyrë manipulimin e votës apo listës së votuesve. Spaho tha se gjithashtu ai u mundëson emigrantëve të votojnë, duke ndikuar në këtë mënyrë edhe në rritjen e numrit të votuesve. /tesheshi.com/
