Tashmë, ligjërimi politik i Edi Ramës po njeh dhe ndërhyrje letrare, siç ka qenë rasti i sotëm ku “ujin” e ka zëvëndësuar me “raki” në thënien “stuhi në një gotë….”. Kështu pra, shefi i qeverisë së Tiranës, e ka cilësuar revolucionin e shpallur nga opozita si një “stuhi në një gotë rakie”.
Duke folur nga Saranda në kuadër të dialogut me militantët e PS-së, Rama tha se nuk justifikohet koncepti i hedhur nga opozita për të rrëzuar qeverinë, pasi sipas tij ajo kërkon të rrëzojë institucionet.
“Sot kemi arritur në pikën që thonë ‘na e kopjuat mandatin’, prandaj nuk na ka mbetur gjë tjetër veçse të bëjmë revolucion. Na i morët të gjitha s’kemi program, prandaj ne po marrim gurët, shishet e benzinës, ato shufrat e hekurit dhe po turremi çfarë të na dalë përpara. Kjo është tragjike për një vend që sot ka mbetur pa opozitë, s’ka opozitë. Kjo nuk është opozitë, është një përpjekje për të kthyer të shkuarën. Përpjekje e nxitur dhe e amalgamuar nga tmerri i humbjes së privilegjeve. Thanë një shprehje të bukur: humbëm si popull mirëqënien e dy viteve më parë. E dëgjuat, ky popull ishte i mirëqene dhe sot duhet të marrin shishet e benzinës e t’i vërë flakët çdo gjëje që i del përpara se humbi mirëqenien. Mirëqënien e tyre e konsiderojnë mirëqënien e popullit. Duke parë që po e humbin vet, identifikohen me popullin sikur e humbi populli.”
Kryeministri Rama ka nisur një tur fundjavor me slloganin “Të pastrojmë Shqipërinë”, ku ka vendosur të sqarojë nga afër elektoratin në lidhje me reformat e ndërmara.
/tesheshi.com/
