Disa mijëra protestues u mblodhën në zemër të Parisit për të protestuar kundër racizmit dhe dhunës së policisë, me një valë mllefi që po përhapet në të gjithë botën për vdekjen e afrikano-amerikanit George Floyd.
Policia me veshje për rebelimet nisi një kundërreagim, duke larguar qindra protestues me kamion.
Edhe pse në fillim ndoqën protestën nga një distancë në rrugët përreth, në një moment ata hodhën gaz lotsjellës ndaj protestuesve.
Një banderolë e realizuar nga protestuesit në Sheshin e Republikës thoshte: “Shpresoj se nuk do të vdes sot sepse jam i zi”. “Nëse mbillni padrejtësi, do të korrni rebelim,” lexohej në një tjetër.
Assa Traoré, motra e 24-vjeçarit Adam Traoré, i cili vdiq jo larg Parisit në vitin 2016 pasi u ndalua nga policia, iu drejtua protestës.
“Vdekja e George Floyd më kujton vdekjen e vëllait tim të ri në Francë. Ajo që po ndodh në Shtetet e Bashkuara po ndodh edhe në Francë. Vëllezërit tanë po vdesin,” tha ajo.
Familja e Traoré pretendon se ai u mbyt kur tre oficerë policie e shtypën atë në tokë me trupat e tyre. Vdekja e tij nuk është sqaruar zyrtarisht.
Ministri i Brendshëm Christophe Castaner pranoi në fillim të kësaj jave se kishte “dyshime të provuara për racizëm” brenda agjencive franceze të zbatimit të ligjit.
Deklarata e tij u kritikua nga sindikatat e policisë, të cilët thanë se oficerët e policisë kishin rënë viktimë e problemeve me rrënjë të thella sociale. /tesheshi.com/
