Edhe elita shqiptare e Maqedonisë rreshtohet në mbrojtje të Albin Kurtit

Nga Mensur Krasniqi

Intelektualët shqiptarë në Maqedoni, duke filluar nga politikanë, analistë, gazetarë, aktorë etj, kanë dalë me një kumtesë të përbashkët në mbështetje të opozitës kosovare, gjegjësisht kundër arrestimit të Arrestimit të Albin Kurtit.

“Të shqetësuar dhe të indinjuar nga cënimi i integritetit të përfaqësimit demokratik dhe politik, të shqetësuar nga demonstrimi i dhunës ndaj opozitës demokratike në Kosovë, të alarmuar nga fushata për cenzurim të pakënaqësisë legjitime nga ana e përfaqësuesve të subjekteve opozitare në Kosovë; ne shprehim protestën tonë ndaj arrestimit të Albin Kurtit dhe përfaqësuesve legjitim të “Vetëvendosjes” dhe të partive të tjera opozitare në Republikën e Kosovës”, thuhet në kumtesën e tyre.”

Ata njëkohësisht, nënvizojnë papajtueshmerinë e tyre ndaj përpjekjeve për imponim të vendimeve anti-kushtetuese dhe anti-kombëtare, për imponimin autoritar të vendimeve për (kon)federalizim të Republikës së Kosovës nëpërmes themelimit të Bashkësisë së Komunave me shumicë Serbe si entitet monoetnik dhe tjetërsimit të territorit të Republikës së Kosovës në marrëveshjen për Demarkacion të kufirit me Malin e zi.

“Me vëmendje të pandarë për peshën e këtyre vendimeve autoritare të cilat prekin thellë indin, shpirtin dhe mirëqenien afatgjate të kombit shqiptar kudo në rajon; shprehim kundërshtimin tonë ndaj veprimeve të tilla dhe kërkojmë lirimin e menjëhershëm të Albin Kurtit dhe të burgosurve të tjerë politik në Kosovë; duke iu bashkuar apelit të intelektualëve nga Shqipëria. Si gjest i solidarizimit kombëtar në mbrojtje të figurave me relevancë mbarëkombëtare dhe autoriteteve autentike të vlerave universale demokratike dhe progresive”, kështu përfundon kumtesa e përbashkët e nënshkruar nga: