Nga Blendi Gashi
Ka marrë fund një prej precedentëve më të rrallë në historinë politike të një vendi, ku një ministri mbeti jo pak por 5 muaj pa ministër. Kjo ndodhi në Kosovë me Ministrinë e Integrimeve, ku që nga shtatori, kur kreu i saj Bekim Çollaku dha dorëheqje për t’u larguar drejt një tjetër posti, ky dikaster mbeti pa kokë drejtuese.
Por këtë të martë, u vendos që ky rekord të mos zgjasë më. PDK-ja e Kadri Veselit, pas shumë refuzimeve brenda partisë për ta marrë “Integrimin”, ku veçohen “Jo”-të e Blerta Deliut-Kodrajt dhe Uran Ismailit, vendosi që të emërojë një emër jo fort të njohur, Mimoza Ahmetajn.
Kjo e fundit, të vetmen gjurmë që ka lënë në jetën publike, dhe politike natyrisht, e ka në sferën e takimeve protokollare. Afro 3 vjet më parë, më saktësisht në 9 janar të 2014-ës, ajo u takua me mbretin Filip të Belgjikës për t’i dorëzuar letrat kredenciale.
Por pamja e saj para monarkut të vendit flamand ishte e pazakontë. Ahmetaj u shfaq me një fustan që në Kosovë njihet me emrin “dallame”, nga ato që vishnin nuset në të ashtuquajturën “ditë të grave”. Dhe ky akt i saj u bë kryelajm në mediat kosovare.
Po kush është ministrja e re e Integrimeve?
Ahmetaj ka qenë ambasadore në Mbretërinë e Belgjikës. Nga kjo pozitë, ka mbuluar Bashkimin Evropian, NATO-n dhe Luksemburgun.
Para emërimit në këtë pozitë, ka shërbyer si ambasadore edhe në Slloveni.
Më parë, Ahmetaj ka mbajtur pozitën e këshilltares në Kryeministri, gjatë kohës sa Hashim Thaçi ishte kryeminisitër, si dhe për një mandat ka mbajtur edhe postin e deputetes.
Është e lindur në Prishtinë, më 1 tetor 1971.Me profesion është doktoreshë, ndërsa është e martuar me Ferid Koçanin dhe kanë tre fëmijë. /tesheshi.com/
