Nga Bardha Nergjoni
Panairi i Librit duket se është kthyer në një trend për të rinjtë, një tip xhiroje e mbushur me ndjenjë vaniteti. Numri më i madh i vizitorëve mesditën e së premtes ishte një tregues se ata janë të interesuar më tepër për të bërë një selfie sesa për prurjet e reja nga shkrimtarë e shtëpi botuese. E kur bëhet fjalë për të rinj, Blendi Fevziu duket se ka marrë trofeun e njeriut më të preferuar. Me qindra autografe e fotografi rrethojnë gazetarin që modestisht e shpjegon këtë dyndje të rinjsh, sidomos përballë librit të tij “Pushteti”, si një vizitë të organizuar dhe tërheqjen ndaj tij për shkak të figurës televizive.
“Ka të rinj sot se shkollat i kanë sjellë nxënësit në panair. Pjesa më e madhe e tyre nuk kanë shumë lidhje me librin sesa takojnë një gazetar që e shohin në televizor dhe duan të bëjnë një fotografi”. Ndërkohë, për frymën e këtij panairi sipas Fevziut është akoma fillimi dhe për ta kuptuar. “Ndoshta të shtunën ose të dielën mund të japë një mendim për ecurinë e tij pasi pjesa më e madhe lexuesve vijnë të premten pasdite dhe të shtunën”. Ndërkohë librin e tij e cilëson “një libër të këndshëm për t’u lexuar”.
Për të hyrë më tej në librin historik, Ilir Ikonomi ka sërish fjalën pushtet në vëllimin voluminoz të një biografie. “Esat pashë Toptani: Njeriu, lufta, pushteti” vjen i sapo dalë nga botimi në këtë panair dhe gazetari i mirënjohur i “Zërit të Amerikës” është aty për të folur për personazhin e tij historik, Esatë pashën. “Nuk më intereson nëse është apo jo voluminoz, por më shumë kam qenë i prirur të sjellë gjëra të reja. Sa i përket prurjes së re mendoj se duke lexuar një personazh shqiptar lexon një copëz të historisë pasi shumë personazhe të tillë bëjnë të tërën, pra historinë”. Fluksin e njerëzve e quan shumë normal si një ogur i mirë që leximi nuk ka rënë. “Ka shumë të rinj dhe kjo është një gjë shumë e mirë. Nuk mendoj se është trend pasi njerëzit janë vazhdimit me librin. Në përshtypjen time nuk kemi një krizë të librit pasi ata që lexojnë janë të destinuar të shkojnë tek libri dhe ajo çfarë shoh është mjaft pozitive”.
Ndryshe nga të tjerë, Albatros Rexhaj nuk ka ardhur me një vëllim të ri në këtë panair por më shumë po teston ato çfarë ka botuar, lexuesit duke u përgatitur për librin e ri. “Ideja ishte të sprovoja veten me titujt që kam nxjerrë përballë lexuesit sesa mund të kenë interes ata”. Përshtypjet e ia mjaft pozitive por jep një shpjegim të tijin pse njerëzit po tërhiqen më shumë nga librat historikë. “Jam i befasuar për të mirë. Ndërkohë sa i përket orientimit të lexuesve drejt librave ka një shpjegim. Publiku është i diktuar nga realiteti. Duke ndjekur medien i intereson më shumë aktualiteti dhe ky është trend global. Kjo është edhe arsyeja që librat historikë po shkruhen me frymë letrare. Ndërkohë poezia ka publikun e vet besnik dhe nuk ndryshon”. Libri për të cilin përgatitet është “Netë në Kastria”, për të cilin thotë se do jetë diçka ndryshe që do të ngjallë interes.
Ndërkohëm romanet vazhdojnë të kenë lexuesit e tyre që prirjen drejt librave jo shumë voluminoz që të kënaqin shijet përballë një realiteti frenetik që Tirana dhe qytetet përreth saj dalëngadalë po e ndjejnë. /tesheshi.com/
