Yeni Şafak, një prej të përditshmeve më të spikatura në shtypin turk, njofton se njeriu që qëndron pas përpjekjes së dështuar për grusht shteti të 15 korrikut është gati të largohet prej Shteteve të Bashkuara të Amerikës.
Fethullah Gylen, i dyshuar si ideatori i grushtit të shtetit në Turqi, gjendet prej më shumë se 15 vitesh në SHBA, në një mërgim të vetimponuar.
E përditshmja turke u referohet shërbimeve të inteligjencës kur raporton se Gyleni është në përgatitje për ta lënë vendbanimin aktual në Pensilvani.
Raportimi, gjithnjë sipas gazetës, vjen vetëm një ditë pasi ministri turk i Drejtësisë, Bekir Bozdag, deklaroi se zëvendëspresidenti amerikan, John Biden, e ka pranuar se Ankaraja kishte ofruar prova konkrete mbi Gylenin si ideatori i puçit.
Belgjika, Brazili dhe Kanadaja raportohen si vende ku mund të strehohet Gyleni në momentin e largimit nga SHBA-të.
Belgjika shihet si vendi më i sigurt për shkak të precedentëve, pasi edhe më herët ky vend nuk ka pranuar t’i dorëzojë Turqisë persona të kërkuar, edhe pse mes Ankarasë dhe Brukselit ka një marrëveshje ekstradimi.
Brazili dhe Kanadaja po ashtu janë dy vendmbërritje të mundshme, nënvizon Yeni Şafak.
Turqia ka kërkuar prej kohësh nga SHBA-të ekstradimin e Fethullah Gylenit, drejtuesit të organizatës FETÖ. Një kërkesë e papërmbushur deri tani, e që shpesh është bërë shkak për fërkime mes dy vendeve aleate. /tesheshi.com/
