“Vendi ynë është në udhëkryq. Shoh që varfëria është shumëfishuar. Zhvillimet e fundit janë dramatike për vendin tonë, jo se janë të reja dhe jo se nuk i dinim, por shpërthimi i tyre ka bërë që të humbasë shpresa”, kështu është shprehur së fundi ish-kryetarja e Kuvendit dhe njëherësh ish-nënkrytare e PD-së, Jozefina Topalli, e mënjanuar nga Basha me mosfutjen në listën për deputetë në zgjedhjet e 25 qershorit.
E njohur për gjuhën e saj të ashpër e dëshpërimndjellëse në kushtet kur gjendet në opozitë, znj. Topalli e ka vizatuar tërësisht gri situatën politikë pa të në qendër, duke hedhur dhe kritika ndaj zhvillimeve parlamentare, ku muungesa e saj tashmë ngjan dhe si diçka historike.
“Kam ndal hapin për arsye të zhvillimeve që dihen, por nuk jam fare indiferente ndaj politikës. E ndjek çdo minutë, 24 në 24 orë. Ndoshta di më shumë për shkak të pozicioneve që kam pasur dhe e kuptoj edhe më mirë se çfarë po ndodh. Unë dyshoj shumë se ata janë të gjithë bashkë dhe në Parlament luajnë një teatër gati të neveritshëm. Sigurisht që më mungon foltorja dhe jo ajo fitore që është sot në Parlament. Kjo nuk do të thotë se unë jam tërhequr nga politika”. Znj. Topalli i bëri këto komente, pasi një grup të rinjsh në Shkodër, e uruan për ditëlindje. /tesheshi.com/
