Kur ferma e çiftit anglez Peter dhe Jean Bartley filloi të marrë tatëpjetën, një bisedë e rastësishme ndihmoi në kthimin e pasurisë dhe sigurisë së tyre.
Çifti vendosi që ta kthejë fermën e tyre në “hallall”, dhe vetëm disa muaj më pas filluan të vërshojnë klientët nga pjesa veri-perëndimore e Anglisë.
Peter dhe Jean u zhvendosën nga Cheshire në Lancaster katër vjet më parë, dhe shumë shpejt morën fermën Ward Field në Galgate, ku hapën dhe një dyqan me prodhimet e saj .
“Ferma kanë qenë gjithë jeta ime, kurrë nuk jam marrë me ndonjë punë tjetër”, tha Peter, 69 vjeç.
Jean, 66 vjeç, shtoi: “Peter ishte fund e krye një fermer, i cili nuk mund ta braktiste profesionin e tij, kështu që përfunduam këtu ku jemi.”
“U deshën rreth 10 ditë për të menduar dhe për të marrë këtë vendim. M’u desh të rrezikoja, dhe deri tani ky rrezik u shpagua. Jam i lumtur që fillova këtë biznes, i cili duket të jetë aq interesant por edhe njerëzit që na vizitojnë, janë gjithashtu shumë të interesuar”.
“Biznesi familjar tani shet mish qengji, pule dhe lope hallall, gjithçka të freskëta dhe të paketuara me vakum, si dhe reçel, salca dhe ëmbëlsira. Dyqani është i hapur shtatë ditë në javë gjatë gjithë ditës”, thotë Peter. Ai pranon se çifti ende po mëson gjëra të reja në lidhje me biznesin e tyre të ri.
“Është një mënyrë krejtësisht ndryshe e zhvillimit të bujqësisë dhe blegtorisë.
Mënyra se si klientët tanë dëshirojnë të bëhet therrja dhe prerja e mishit më magjeps.
Bëhet krejtësisht ndryshe dhe për këtë arsye ne përdorim një kasap musliman për ta bërë prerjen. Ne kemi kuptuar se nuk mund të gjesh dy njerëz që dëshirojnë prerjen e mishit në të njëjtën mënyrë.
Në muajt e fundit kam mësuar shumë gjëra të reja në lidhje me këtë metodë të therrjes dhe prerjes.
Shumë njerëz nuk e kuptojnë se pa e komunitetin musliman bujqësia do të vdiste, andaj është e domosdoshme që më shumë fermerë të shohin këtë realitet.
Kam lexuar së fundi se 88 për qind e të gjitha kafshëve në Angli çdo javë therren sipas mënyrës hallall, 5 % kosher dhe 7% sipas mënyrës tradicionale britanike”, tha ai.
Familja Bartley ka punësuar Rafiç Dean dhe birin e tij Asgar nga shërbimet hallall në thertoren në Lancaster, për të therrur kafshët e tyre.
Veterinarët e Ministrisë së Bujqësisë janë të pranishëm gjatë çdo therje, për të kontrolluar nëse ajo është kryer siç duhet. Vizitorët vijnë nga gjithë pjesa veriperëndimore e Anglisë.
Pavarësisht disa reagimeve negative, kur ferma ndryshoi ambalazhin për herë të parë, dhe për shkak të përdorimit të fjalës arabe “hallall” në shenjën e fermës, puna e mundimshme e Peter dhe Jean tani po shpaguhet, me klientët që po vizitojnë fermën nga gjithë pjesa veriperëndimore, përfshirë Bolton, Blackburn, Stockport, Mançester, Rochdale, Oldham dhe Preston.
Ata gjithashtu po shesin mish për stafin dhe studentët në Universitetin Lancaster, dhe së fundi për refugjatët sirianë që u vendosën në Lancaster vitin e kaluar.
“Shpresojmë se mund të ndihmojmë që jetët e tyre të bëhen pak më të këndshme”, tha Peter.
Çifti, i cili ka tre djem dhe dy nipër, fitoi certifikatën zyrtare të Komitetit të Monitorimit të produkteve hallall (HMC) javën e kaluar, i cili tani do të shfaqet në të gjitha prodhimet e tyre.
“Shumë njerëz që blejnë nga ne, shfaqen pak të kujdesshëm nëse është vërtet hallall, për shkak se ne jemi anglezë të bardhë”, tha Peter.
“Ne aplikuam për çertifikatën e HMC-së në mënyrë që të dëshmojmë se është hallall i vërtetë. Kjo i jep komunitetit musliman siguri dhe besim shtesë në atë që po bëjmë, që është vërtetë mirë edhe për ne”, shtoi ai./tesheshi.com/
