E kaluara kolonialiste: këshilltarë bashkiakë në Barcelonë kërkojnë heqjen e statujës së Kolombit

Një grup këshilltarësh anti-kapitalistë në Barcelonë shpresojnë të rrëzojnë statujën e Kristofor Kolombit që qëndron në këmbë të “La Rambla”-s për më shumë se një shekull, me argumentin se qyteti nuk duhet të lavdërojë trashëgiminë kolonialiste të eksploratorit.

Memoriali 60 metra i lartë, në majë të të cilit qëndron një statujë bronxi e gjenovezit duke treguar detin, ka qenë pjesë e peizazhit të Barcelonës që nga viti 1888. Në mbishkrimin në bazamentin e statujës nderohen kolegët e Kolombit dhe mjeshtrit e tij, mbreti Ferdinand dhe mbretëresha Izabela.

Propozimi i tre këshilltarëve do të përfshihet në axhendën e këshillit të qytetit të premten e kësaj jave, dhe në të, ata apelojnë që statuja të hiqet së bashku me të gjitha dekorimet në bazën e saj  që lavdërojnë pushtimin e Amerikës dhe “muzeumifikimin” e saj të shoqëruar me interpretime historike.

Më e përshtatshme, sipas tyre, do të ishte një memorial që reflekton “rezistencën amerikane ndaj imperializmit, shtypjes dhe segregimit të indigjenëve dhe afro-amerikanëve”.

Imazhi i Kolombit nuk është i vetmi monument në listën e tyre: këshilltarët dëshirojnë gjithashtu heqjen e statujës së biznesmenit dhe tregtarit të skllevërve,  Antonio López y López, markezit të Comillas, që duhet të rrëzohet nga piedestali jashtë ndërtesës së zyrës postare. Në vend të tij, trioja propozon një monument për të përkujtuar viktimat e tregtisë së skllevërve.

Sugjerimet e tyre, sidoqoftë, shkojnë shumë më larg se statujeria. Siç duan të heqin flamujt spanjollë nga ndërtesat bashkiake në Barcelonë, ata do të donin gjithashtu ta shndërronin 12 tetorin, festën kombëtare në të cilën Spanja shënon zbarkimin e Kolombit në Amerikë, në një ditë të zakonshme pune.

Ata thonë se kjo datë jo vetëm që shënon një “veprim të patoleruershëm kolonializmi dhe imperializmi”, por gjithashtu, “genocidin ndaj popullsisë indigjene amerikane prej pushtuesve kolonizatorë dhe një veprim agresioni të nacionalizmit spanjoll ndaj gjithë popujve që ka pushtuar dhe pushton”.

Kërkesa e fundit është ajo që këshilli të ndalojë aktivitetet fashiste në qytet.

Në Spanjë, sidomos në radhët e të majtëve, po rritet neveria ndaj nocionit të festimit të 12 tetorit.

Vitin e kaluar, kryebashkiakja e Barcelonës,  Ada Colau, tha se vendi nuk duhet të festojë “një genocide” me parada ushtarake ku harxhohen 800 mijë euro; ndërsa José María González, kryebashkiaku i Kadizit që mbështetet nga Podemos, shkroi në Twitter: “Ne nuk e zbuluam kurrë Amerikën; ne masakruam dhe pushtuam një kontinent dhe kulturën e tij në emër të Zotit”.

Përgatiti: Juli Prifti – /tesheshi.com/