Kryemistri Rama e nisi ditën duke kujtuar 2-vjetorin e tërmetit tragjik që goditi zemrën e Shqipërisë, Tiranën, Durrësin dhe Kurbinin, duke i kushtuar një përsiatje të shkurtër.
“Tragjeditë sprovojnë njerëzit, popujt, shtetet dhe dy vjet nga fatkeqësia marramendëse e tërmetit, duke kujtuar humbjet, plagët, dhimbjet e duke parë çka mundëm të bëjmë deri këtu, mund të themi pa drojë se sot jemi ngritur më të fortë e po ashtu mund të marrim frymë të lehtësuar, për faktin se mijëra familje të goditura prej asaj fatkeqësie sot janë më mirë se sa përpara goditjes prej saj.
Kujtoj me dhimbje familjet që humbën njerëz të dashur dhe mbetem mirënjohës pa fund për të gjithë ata që dhanë ndihmën e parë, që u solidarizuan nga të katër anët e vendit dhe të botës me të goditurit nga fatkeqësia, që punuan e punojnë pa pushim për të kthyer deri familjen e fundit në shtëpi më të mirë, më të fortë, më të bukur”, janë fjalët e zgjedhura të të parit të qeverisë.
Kujtojmë se një tërmet i përmasave të tilla nuk kishte ndodhur që nga viti 1979. Pra, pas afro 40 vitesh, do ishte Rama që si kryeministër do kishte barrën e rëndë të menaxhonte një krizë fatkeqësi të tillë. /tesheshi.com/
