Dy fëmijë të moshës 13 dhe 15 vjeç janë mbytur në Liqenin e Shkodrës. Policia është njoftuar nga banorët dhe ka shkuar menjëherë në vendin e ngjarjes.
Në njoftimin zyrtar mbi ngjarjen shpjegohet se ishin 7 persona në total që janë futur në liqen me një varke të vogël dhe pasi kanë arritur në një thellësi të konsiderueshme të rinjtë kanë nisur të lahen. Policia thotë se ky është momenti kur edhe ka ndoodhur tragjedia, ku dy fëmijët E.T dhe S.T janë mbytur, ndërsa 5 të tjerët kanë mundur të dalin në breg.
Njoftimi i policisë
Me datë 17.08.2017, rreth orës 16:00, ka ardhur një telefonatë në Sallën Operative të Komisariatit të Policisë Malësi e Madhe se në Liqenin e Shkodrës, në vendin quajtur Grilë, territor i Malësisë së Madhe, janë mbytur në liqen dy fëmijë.
Menjëherë në vendngjarje kanë shkuar shërbimet e policisë, ku ka rezultuar se ishin mbytur shtetasit E. T.,13 vjeç dhe S. T. 15 vjeç, banues në fshatin Gruemirë (kushërinj me njëri tjetrin).
Nga informacionet paraprake mësohet se 7 shtetas ishin futur në liqen me një varkë të vogël dhe kur kanë arritur në thellësi janë hedhur për t’u larë.
Varkën e ka marrë rrjedha e liqenit, ku 5 shtetas kanë mundur të dalin në breg , ndërsa dy shtetasit e lartpërmendur janë mbytur.
Shërbimet e Policisë së bashku me disa banorë të fshatit rreth orës 17.45 kanë bërë të mundur nxjerrjen e trupave të pajetë nga liqeni.
Grupi hetimor po vijon punën për zbardhjen e plotë të rrethanave të ngjarjes. /tesheshi.com/
