Ndaj Sporting Gijonit, një prej skuadrave të fundit në renditjen e kampionatit spanjoll, u duk se Reali i Madridit do ta kishte të lehtë këtë pasdite.
Një 11-metërsh i paqenë në fillim të ndeshjes, i kthyer në gol nga Cristiano Ronaldo, la përshtypjen se do të kishte një goleadë në “Santiago Bernabeun” jo të mbushur si duhet.
Këtë përshtypje e përforcoi një tjetër gol i portugezit në minutën e 18-të, që e çoi rezultatin në 2-0.
Ama ndeshja ngjau se mori drejtim tjetër, kur Carlos Carmona ngushtoi shifrat për udhëtuesit në minutën e 37-të.
Në mes të një shiu të rrëmbyeshëm, Sporting Gijoni pati mundësinë të barazonte 12 minuta para mbarimit të lojës, por kroati Duje Cop gjuajti aq keq sa më s’ka nga pika e bardhë e 11-metërshit.
Topi i dërguar jashtë vulosi fatin e ndeshjes, që u buzëqeshi vendasve. Reali i Madridit fitoi 2-1 dhe u ngjit në kuotën e 33 pikëve.
Në vend të parë në klasifikim, me shtatë pikë diferencë ndaj Barcelonës së vendit të dytë, Reali pret i qetë rezultatet e rivalëve në La Liga. /tesheshi.com/
