Dritan Demiraj, i cili për 4 muaj drejtoi Ministrinë e Brendshme si ministër teknik, pas marrëveshjes së 18 majit mes kryeministrit Edi Rama dhe kreut të PD-së, Lulzim Basha, i është drejtuar me një thirrje të gjithë efektivëve të policisë, në ditë që konsiderohen të ‘errëta’ për ta.
“Ditët e fundit Policia e Shtetit në mënyrën më të papreçedentë është vënë nën shënjestër nga grupet kriminale dhe të organizuara.
Policia Shtetit një nga organizatat që sakrifikojnë çdo ditë për të ruajtur rendin dhe qetësinë është sulmuar me breshëri plumbash, me thika dhe me makina të blinduara.
Si ish-ministër i Brendshëm, i bëj thirrje të gjithë efektivëve të policisë që të kundërveprojnë me forcën më të madhe ndaj krimit që ngre dorë kundër uniformës dhe Shtetit. Kjo duhet të jetë një beteje e fortë, pa kompromis dhe me zero tolerancë.
Si qytetar e ndjej detyrim moral të reagoj kur kolegët, bashkëqytetarët tanë ndjehen të kërcënuar, të dhunuar dhe të pa mbrojtur nga keqpolitika”, shkruan Demiraj në rrjetin social Facebook.
