Në agim, tanket e ushtrisë irakene kishin marrë pozicion në qendër të kryeqytetit të Kuvajtit. Ishte 2 Gushti i 25 vjetëve më parë e me pushtimin e Kuvajtit për shumëkënd i papritur, niste lufta e Gjirit që për gati shtatë muaj sa zgjati iu kushtoi jetën 5 mijë civilëve, 30 mijë ushtarëve irakenë dhe 500 ushtarakëve të koalicionit që drejtohej nga Shtetet e Bashkuara.
Lufta e Gjirit ka hyrë në histori edhe pasi ishte konflikti i parë i transmetuar drejtpërdrejt në televizion, në mënyrë të veçantë nga CNN amerikan. Imazhet që në ekranet e të gjithë botës vinin të ngjyrosura me jeshile të errët, të ndërprera nga drita të forta të trajektoreve të raketave, ishin ato të bombardimeve të para në Bagdat.
Lufta nisi me pushtimin iraken të Kuvajtit e më pas, do të kujtohet sidomos në Izrael e në Arabinë Saudite, për shkak se ato u gjendën në objektivin e raketatave skud, si aleatë të Shteteve të Bashkuara në rajon. Përgjigja e koalicionit ishte lëshimi i raketave Patriot të cilat arritën të reduktojnë në minimum kërcënimin iraken, pasi i arrinin dhe i shkatërronin raketat skud përpara se ato të arrinin në objektiv.
Iraku pushtoi Kuvajtin pasi për javë të tëra kishte kërcënuar për veprime ushtarake si masë për nxjerrjen “e paligjshme” të naftës nga ana e shtetit të vogël të Gjirit në puset e përbashkëta përgjatë kufirit. Pasi kishin pozicionuar trupa dhe mjete në gjysmën e dytë të korrikut, trupat kaluan kufirin shkretëtinor në 3 të mëngjesit të datës 2 gusht. Për Shtetet e Bashkuara, mbështetës të Kuvajtit, kjo ishte shpallje lufte.
Pesë ditë më vonë, niste operacioni “Stuhia e Shkretëtirës” dhe trupat e para amerikane mbërritën në Arabinë Saudite.
Lideri i Irakut, Saddam Hussein shpalli aneksimin e Kuvajtit si provincën e 19 të vendit të tij. Iraku kurrë nuk i kishte pranuar kufijtë e caktuar nga Britania, me të cilët u krijua Kuvajti si entitet i veçantë.
Pas dërgimit të trupave britanike dhe franceze në bazat saudite, Këshilli i Sigurimit të OKB-së miratoi rezolutën 678 që i vendoste Bagdatit afatin e fundit 15 Janarin 1991 për t’u tërhequr nga Kuvajti.
Pasi Iraku nuk e zbatoi rezolutën, më 17 Janar nisën sulmet ajrore dhe pesë javë më vonë, më 24 Shkurt nisi edhe operacioni tokësor për të detyruar Irakun të pranonte armëpushimin. Ishte presidenti Xhorxh Bush që njoftoi “fitoren” dhe çlirimin e Kuvajtit.
Në luftë humbën jetën 3600 civilë irakenë, një mijë kuvajtianë dhe 300 të tjerë të kombësive të ndryshme.
Me përfundimin e Luftës së Gjirit filluan problemet me kurdët në veri, dhe shiitët në Lindje. Forcat e sigurisë irakiane i zgjidhën me forcë këto probleme, dhe nisi eksodi i kurdëve drejt Turqisë e Iranit ku shkuan më shumë se 1 milion kurdë.
Me pretendimin për spastrimin e armëve balistike në duart e Saddam Hussein dhe mbështetjes që ky i fundit i jepte terroristëve, pas Luftës së Gjirit, pasoja e parë ishte pushtimi i Irakut, pushtim që nisi më 20 Mars 2003.
Më 15 Prill gjithë Iraku ishte nën kontrollin e forcave të koalicionit që shënon nisjen e “historisë së re” të Irakut, ku dhuna dhe paqëndrueshmëria politike u bënë të zakonshme. /tesheshi.com/
