Nga Arseola Mulia
Prokuroria po heton 7 persona të akuzuar si pjesë e një grupi të strukturuar criminal, i cili dyshohet se ka bërë të mundur përgatitjen, vendosjen dhe shpërthimin e telekomanduar me celular në Farmacinë e babait të ministrit të Brendshëm Saimir Tahiri, si dhe vendosjen e lëndës shpërthyese në stacionin e autobuzëve në Rrugën “Muhamet Gjollesha”. Nga ky grup criminal, 5 persona janë arrestuar ndërsa dy të tjerë janë shpallur në kërkim. Të arrestuar janë tashmë Lumjan (Emiljano) Matmuja, Ernest Gjuta, Kamber Bruka dhe Erjon Dule, si dhe në qelite e paraburgimt vazhdon të qëndrojë i arrestuari i pare, Emirjon Gjuta. Ndërkohë janë shpallur në kërkim Vladimir Gjuta dhe Baftjar Bruka.
Gjithashtu, sot gjykata e Krimeve të Rënda ka ndryshuar me kërkesë të Prokurorisë masën e sigurisë nga “arrest me burg” me afat 15 ditor në “arrest me burg” pa afat për Emirjon Gjutën, në emër të të cilit ishin regjistruar kartat telefonike nga u komanduan shpërthimet. Prokuroria e Krimeve të Rënda dhe Policia e Shtetit, tashmë mendojnë se ka siguruar prova që implikojnë Vladimir Gjutën dhe pjesëtar të tjerë të familjes së tij, në vendosjen e eksplozivit në farmacinë e Bashkim Tahirit dhe atë në rrugën “Muhamet Gjollesha”. Referuar të dhënave paraprake, dyshohet se me anë të përgjimeve ambientale, telefonike dhe vëzhgimeve të ndryshme, janë siguruar prova materiale që implikojnë të dyshuarit në kryerjen e këtyre shpërthimeve .
Po kush është Vladimir Gjuta, dhe cili është raporti i tij me policinë? Përplasja e para e policisë me të pas ndryshimit të qeverisë, ka ndodhur në prill të vitit 2014, kur ministri i Brendshëm Saimir Tahiri, ankohet pranë Presidentit për ndryshimin e masës së sigurisë për Vladimir Gjutën dhe nipin e tij, tashmë të shpallur në kërkim, Baftjar Brukën. Në atë kohë, ata kanë qenë të dyshuar për tentativë vrasjeje të disa personave në Kukës. Përplasja e dytë me policinë mësohet se ka ndodhur në qershor të vitit 2014, pas vrasjes së Artan Santos. Pronarët e lokalit “Vila Gjuta” në Tiranë, kanë refuzuar t’i japin policisë kamerat e sigurisë për të identifikuar autorët e vrasjes. Në shtator të vitit 2014, forcat e ndërhyrjes së shpejtë, në një aksion në zonën e ish- Bllokut ndaluan dhe arrestuan tre persona, që lëviznin me mjete të blinduara . Të dy makinat u bllokuan dhe personat u shoqëruan në polici. Një prej tyre ishte Vladimir Gjuta, që më pas u lirua.
Pas kësaj ngjarjeje, mësohet se policia tatimore ka zbritur në biznesin që ndodhet në Rrugën e Elbasanit, por pas kërcënimit ata janë larguar nga lokali. Më datën 6 dhjetor, në afërsi të stadiumit “Qemal Stafa”, Vladimir Gjuta u arrestua pas një sherri me efektivët e policisë rrugore. Gjuta dyshohet se ka kundërshtuar forcat e rendit dhe u arrestua pak metra më tej. Po atë ditë efektivët e tatimeve kanë bërë edhe kontrollin e biznesin nën shoqërimin e forcave të mëdha të policisë. Për këtë incident, ai u mbajt në qeli për rreth 20 ditë ku u lirua nga Gjykata e Tiranës me masën e sigurisë “arrest shtëpie”. Masë, e cila është ende në fuqi për ngjarjen e 6 dhjetorit. Gjithashtu mësohet se pas atentatit të dështuar ndaj Emiljano Shullazit në afërsi të Qafë Kasharit, efektivët e FNSH-së kanë bërë kontroll në bizneset dhe banesën e Vladimir Gjutës. Policia ka ushtruar kontroll edhe ditën e atentatit të dështuar në Durrës ndaj Ardian Trotës, i cli mbeti vetëm i plagosur. Vladimir Gjuta tashmë është shpallur në kërkim, pasi plicia ka një tjetër urdhër-arresti ndaj tij…/tesheshi.com/
