Parlamenti shqiptar i hapi rrugë prokurorisë së përgjithshme për të arrestuar dy deputetët: Tom Doshi dhe Mark Frroku. Pas një debate të ashpër Kuvendi votoi me 80 vota pro, asnjë kundër dhe asnjë abstenim për deputetin Doshi. Ndërsa për Frrokun u shënuan 79 vota kundër dhe 1 abstenim. Opozita ka braktisur punimet e Kuvendit, ndërsa në sallë ishte e pranishme vetëm deputetja e PD Mesila Doda. “Nuk mund të largohesha nga salla e Kuvendit, pasi respektoj bindjet e mia për një Parlament më të mirë. Nuk kisha pse të ndiqja vendimin e grupit për të lënë sallën, ku po votohej për një çështje shumë të rëndësishme”, tha Doda.
Kuvendi i Shqipërisë vendosi kështu për fatin e dy deputetëve Tom Doshi dhe Mark Frroku, pasi Këshilli për Imunitetin i hapi rrugë arrestimit të tyre. Seanca e sotme ishte me debate mes palëve, kryesisht mes opozitës dhe kryesuesit të seancës, Vangjel Dule. Nuk mungoi edhe reagimi i Kryeministrit, sipas të cilit, nuk mund të pranohej një sjellje e tillë parlamentare, në një moment kaq të rëndësishëm. Rama tha: “Ky nuk është klubi i Shtëpisë së Oficerëve dhe le t’i lëmë fjalët e të hyjmë në temë”. “Po ju kërkoj edhe njëherë, respektoni rregulloren dhe po ju citoj rregulloren: Në këtë seancë plenare fjala i jepet deputetit, ndaj të cilit është paraqitur kërkesa për të dhënë shpjegime; raporti i Këshillit nuk është objekt diskutimi, votimi është i fshehtë. Së pari, sot në këtë pikë jemi në një situatë specifike të caktuar nga rregullorja. Edhe përtej kësaj pike ju kërkoj të zbatohet rregullorja në këtë Kuvend. Unë ju siguroj se PS do të tërhiqet nga ky Kuvend në çdo moment që do të shkelet rregullorja. S’mund të pranojmë të japim çdo të enjte një shfaqje të shëmtuar”, tha Rama. Kryetari i Kuvendit Ilir Meta, i cili qëndroi në ndenjëset e Kuvendit, doli në podium, nga kërkoi çuarjen deri në fund të çështjes.
“Një deputet ka falsifikuar raportin mjekësor për të shmangur ballafaqimin me të vërtetetat. Këtë falsifikator keni marrë përsipër të mbroni; merreni dhe dilni dhe në fushatë me të, edhe në Shkodër. Opozita i mban iso presionit ndaj prokurorëve. Ju kërkoj që të respektoni kërkesën e kryetarit të grupit parlamentar të PD-së, që të paraqesë qëndrimin apo raportin e tij. Sa i takon se çfarë tha zëdhënësi i Tomës për xhelatin dhe xhelatët, nuk kam asnjë vërejtje dhe keqardhje. Ju e dini se ekspozimi i çdo prove që është në hetim, para se të shkojë në gjykatë, e bën provën të pavlefshme”, tha Meta.
Ndërkaq, kreu i grupit parlamentar, të PD, Edi Paloka tha se: Ne sapo na erdhi një raport i Këshillit për Imunitetin që është përgatitur nga deputetët e mazhorancës dhe shohim që është përfshirë edhe mendimi i opozitës. Mendimi i opozitës do të paraqitet nga deputetët, nëse mazhoranca do marrë përsipër të thotë mendimin e opozitës nuk e dimë a kemi parlament pluralist. Kërkoj që mendimin e opozitës ta japë zoti Halimi.
Debati Berisha-Dule
Berisha: Ndjehesh komod që ulesh në vendin e një njeriu të akuzuar për dy vrasje. Ai bllokon paraqitjen e provës se i ka dërguar në qeli Durim Bamit xhelatin e i ka thënë të pres kokat e fëmijëve, nëse dëshmon të vërtetën. Nëse ky është trillim ai që e ka bërë meriton ndjekje vetëm për këtë. Por në rast se është e vërtetë aty duhet të ishte Ilir Meta. Ti je Parti e të drejtave të Njeriut, dhe në një farë mënyre me këto veprime duket sikur bëhej avokatia e Ilir Metës me bllokimin e provës, çka stononte me zhvillimin e seancës. A ka mundësi të votojnë njerëzit pa lexuar një germë këtu. Mirë ne që e ndoqëm seancë, por a duhet të njihen ata që s’e ndoqën. Të gjitha këto janë në funksion të një njeriu.
Dule: Askush në këtë sallë dhe në Këshill nuk e kishte të dëshirueshëm praninë e tij, si në zhvillimin, ashtu edhe në vendimmarrje. Ka dhe disa rregulla loje. Drejtimi i seancës është e drejtë kushtetuese.
