Silvan Shalom, ministër i Brendshëm i qeverisë izraelite e njëkohësisht një veteran në partinë Likud, dha dorëheqjen të dielën pas akuzave se gjatë veprimtarisë së tij politike e qeverisëse kishte ngacmuar seksualisht një numër femrash.
Në të njëjtën kohë dhe zëvendëskryeministër, Shalom-i e ka mohur çdo veprim të tillë, dhe e ka justifikuar dorëheqjen duke deklaruar se e bën këtë akt për t’ia kursyer familjes së vet vuajtjet e mëtejshme.
“Rreth 23 vite i kam shërbyer publikut i bindur dhe me besim si një anëtar i Knesset-it dhe si një ministër në poste të ndryshme nga ndjenja se po përmbushja një mision dhe nga dëshira për t’i çuar përpara objektivat e rëndësishëm shoqërorë dhe publikë,” është shprehur ai në një deklaratë.
Nuk ka ende një hetim zyrtar të hapur për këtë çështje, edhe pse shumë femra kanë pretenduar në ditët e shkuara për ngacmim seksual prej ministrit të sapodorëhequr.
Ky nuk është rasti i parë që figura të larta të politikës e qeverisjes izraelite akuzohen, dorëhiqen e hetohen për ngacmim seksual. Një anëtar i parlamentit që i përkiste koalicionit qeverisës, Yinon Magal, dha dorëheqjen muajin e kaluar për të njëjtën gjë. /tesheshi.com/
