Gigi Donnarumma është kthyer në çështje tek Milan. Superportieri ende adoleshent, para pak kohësh nënshkroi kontratën e re me klubin; por agjenti i tij Raiola, këto ditë ka hedhur një “shashkë” jo pak tymuese.
Sipas tij, Donnarumma kontratën e re e ka nënshkruar duke qenë nën një presion psikologjik nga klubi dhe nuk ka qenë shumë i bindur për zgjatjen e saj.
Kaq ka mjaftuar që në të gjithë Italinë të flasin për këtë “proçkë” të re që del nga klubi kuq e zi, që këtë sezon mezi po qëndron në këmbë, pas pritshmërive të mëdha.
Raiola ka lënë të kuptohet se kontrata e re e Donnarummës që e përfshin atë si pjesë të Milanit deri në vitin 2021, nuk i është servirur si duhet portierit 18-vjeçar dhe ka pasur pjesë të errëta, një prej të cilave, edhe klauzola e prishjes së saj.
Po kështu, menaxheri i talentit të portës italiane po synon të shfrytëzojë edhe faktin që Gigi është ende adoleshent dhe nuk e ka ditur tamam se çfarë ka nënshkruar.
Që Raiola ka nisur bisedimet me klube të tjera, kjo është e qartë. Që për Donnarummën ka oferta nga klubet më prestigjoze të botës, edhe kjo është e pamohueshme. Por që skenari të luhej në këtë mënyrë, kjo ka qenë e papritur për të gjithë. Për më tepër kur tifozët e trazuar të Milanit, mezi “e fjetën disi mendjen” për portën, pas dallëge që iu duhet të kalojnë me skuadrën.
Por me sa duket, presioni i Chelsea, Real Madrid, Barcelonës, e PSG, ka qenë mbase qindra milion ballësh, e enturazhi i portierit nuk e ka mbajtur dot.
Nëse Donnarumma prish kontratën me Milanin, ai është lojtar i lirë, duke filluar nga 30 qershori 2018. /tesheshi.com/
