Kryetarja e LDK-së për Gjermani, Donika Gërvalla, është ndaluar të hyjë në mbledhjen e Këshillit të Përgjithshëm të LDK-së.
Ajo fillimisht është ndaluar tek hyrja, por kur ka tentuar të hyjë përsëri rojet e kanë larguar atë me forcë.
Gërvalla ka thënë për Info Magazine të Klan Kosovës se pretekst për largimin e saj ka qenë mungesa e emrit në listë.
“Pretekst është mungesa e emrit tim në listë. Jam pajisur para disa ditësh me dokumentacionin e Këshillit të Përgjithshëm. Në Këshillin e Përgjithshëm ka dy kategori me të drejtë fjale dhe vote dhe vetëm me të drejtë pranie. Është traditë e Këshillit të Përgjithshëm që kryetarët e degëve të jenë të pranishëm”, tha ajo.
Gërvalla ka treguar se për çfarë është mbledhur Këshilli i LDK-së.
“Aty do të diskutohet për çështjet statutare. Ka një pikë të rëndësishme ku do të diskutohet për ndryshimin e një neni në statut, të bën zgjedhjen e kryetarit të LDK-së. Po tentohen të bëhen ndryshime të tilla që ia sigurojnë sërish Mustafës vendin e kryetarit. Në çdo formë do ta kundërshtoja zgjedhjen e kryetarit me aklamacion”, ka thënë Gërvalla.
Pas këtij veprimi të bërë ndaj Gërvallës, deputetja Vjosa Osmani është larguar nga mbledhja.
Në linkun mëposhtë mund të shikoni se si u tërhoq zvarrë Donika Gërvalla dhe nuk u lejua të marrë pjesë në mbledhje:
