Në kontrast të plotë me fjalimin e presidentit amerikan, Barack Obama, vetëm pak orë më parë, kandidati republikan për president, Donald Trump, ka bërë një propozim tepër të debatueshëm, duke kërkuar ndalimin e plotë të hyrjes së muslimanëve në Shtetet e Bashkuara.
I njohur për tonin e tij të ashpër, dhe i vënë shpesh në qendër të vëmendjes muajt e fundit për deklaratat dhe sjelljet e tij të pazakonta, Trump ka bërë thirrje për një ndalim tërësor të hyrjes së muslimanëve në SHBA gjersa përfaqësuesit e vendit të mund të kuptojnë se ç’po ndodh.
Ai i është referuar një anketimi të Qendrës për Politikën e Sigurisë, që sipas tij tregon se 25 për qind e të anketuarve janë në një mendje se dhuna ndaj amerikanëve në SHBA përligjet si pjesë e xhihadit global.
Ndërsa më herët ka patur zëra dhe iniciativa për ta frenuar hyrjen e refugjatëve sirianë në SHBA, Donald Trump kërkon që muslimanët pa dallim të mos lejohen të vënë këmbën në vendin e tij.
Reagimi më i ashpër ndaj propozimit të kandidatit republikan ka ardhur prej një tjetër kandidati, por demokrat, Martin O’Malley, që ka shkruar në Twitter: “Donald Trump heq çdo dyshim. Ai po kandidon për president si një demagog fashist.” /tesheshi.com/
