Pas triumfit përfundimtar mbi senatorin Ted Cruz në Indiana, Donald Trump është i nominuari i partisë Republikane në zgjedhjet presidenciale të nëntorit të këtij viti. Dhe pjesa tjetër e botës ka ngelur gojëhapur nga ngjitja e stuhishme e manjatit.
“Spektri i një konvente të kontestuar ra poshtë dhe primaret republikane janë thjesht shfaqje e një njeriu të vetëm”, shkroi kolumnistja e “The Guardian”, Lucia Graves. “Një shfaqje e madhe, portokalli, e frikshme e një njeriu të vetëm”.
Realiteti sapo ka nisur të zërë vend në mendjen e njerëzve.
“Kështu këtë mëngjes të mërkure, Europa zgjohet për të marrë vesh se Donald Trump në anën tjetër të Atlantikut është kandidati i supozuar i republikanëve”, shkroi gazeta e përditshme e qendrës së majtë franceze, “Liberation”, cituar nga një përmbledhje e BBC për shtypin e ditës. “Një njeri që shumë e konsideronin vetëm pak muaj më parë një klloun. Shumë votues e kanë mbështetur Trump pikërisht për shkak se nuk ka fare eksperiencë politike dhe asnjëherë nuk ka pasur ndonjë detyrë shtetërore”.
Duke i bërë jehonë “fushatës së zgjedhjeve presidenciale më të çmendur” që pret Amerikën, konservativja gjermane “Die Ëelt” deklaron se “e pamendueshmja ka mbërritur për të dëshmuar”.
E përditshmja e respektuar gjermane, “Suddeutsche Zeitung” e përshkruan ngjitjen e Trump si pjesë e “zgjedhjeve historike të shënuara nga një moment marrëzie”.
Tema e nominimit të Trump ka marrë forma të tjera në vende të ndryshme, “Nga një akt qesharak, u shndërrua në revoltë brenda partisë dhe përfundoi natën e kaluar me marrjen e pushtetit të republikanëve”, vë në dukje gazeta liberale gjermane, NRC. Në shkrimin e saj, thuhet se Cruz u përpoq të luajë rolin e shpëtimtarit të kauzës konservatore, duke premtuar respect fetar, por dështoi.
Në vend të kësaj, “republikanët, ashtu si populli i Izraelit, adhuruan Viçin e Artë”, shkruan gazeta.
Një artikull në gjuhën hindu, në një të përditshme kryesore indiane, përmbledh atë që ka ndodhur: “Pasi hyri në politikë 10 muaj më parë, Trump, biznesi i të cilit mund të ngrejë shumë dyshime por ka drejtimin më të pamposhtur, zhvilloi një fushatë që përkuli partinë Republikane dhe zemëroi ndërgjegjen liberale amerikane në marshimin e tij drejt fitores”.
Në Kinë, e cila e sheh fushatën e Trump me një farë gazmendi, media shtetërore dhe ajo private luajtën me dimensionet ekstreme të zgjedhjeve.
“Populli amerikan thotë se nëse Trump bëhet president, demokracia do të marrë fund”, raportonte Phoenix News.
“Amerikanët po nisin ta urrejnë elitën politike ndërsa votuesit vënë bast tek Trump”, shkroi në mënyrë provokative gazeta me kontroll shtetërore, Global Times. “Votuesit kanë vullnetin të vënë bast të ardhmen e Shteteve të Bashkuara të Amerikës e të lejojnë një person nga jashtë politikës e një të marrë politik të vazhdojë garën”.
Një editorial në gazetën e Meksikës, “El Universal” analizonte perspektivën e fushatës presidenciale të Trump. Nga nisja, kandidati i avantazhuar republikan ka marrë një mal me kritika nga fqinji jugor, Meksika, pasi kishte demonizuar emigrantët meksikanë ndërsa ka premtuar të ndërtojë një mur përgjatë kufirit shkretëtinor mes dy vendeve.
“Shumë meksikanë mund të jenë të shtangur nga suksesi i një personi që ka thënë gjëra aq absurd – që nga ideja e marrë për ndërtimin e një muri në kufi me Meksikën dhe detyrimin për ta paguar atë deri tek deklarata se ngrohjen globale e kanë shpikur kinezët për të dëmtuar sektorin prodhues në Shtetet e Bashkuara”, shkruhet në editorial. “Pavarësisht këtyre, ashtu si edhe populli meksikan që është i lodhur nga politikanët tradicionalë, e njëjta gjë ka ndodhur edhe në Shtetet e Bashkuara. Të qënit larg nga mjedisi politik dhe elitat politike të Uashingtonit, është në vetvete një virtut që duket më i rëndësishëm sesa defektet e tjera”.
Përgatiti: Juli Prifti – /tesheshi.com/
