Mund të duket klishe kur thua se ushtrimet janë të rëndësishme, por tani është e vërtetuar shkencërisht se hiking-u në natyrë, faktikisht, mund të na ndryshojë trurin! Dhe pjesa më e mirë e tërë kësaj është se nuk të merr shumë kohë apo energji, andaj edhe njerëzit që janë në mbipeshë apo ata që janë shumë të zënë, nuk kanë arsyetim për të mos e praktikuar atë rregullisht, ngaqë hiking-u vërtet mund të bëjë ndryshim pozitiv në jetën e secilit.
Jo më mendime të panevojshme dhe stres
Një studim i publikuar në punimet e National Academy of Sciences gjeti se të kaluarit e kohës në natyrë zvogëlon dukshëm mendimet negative dhe ato obsesive.
Gjegjësisht, kur ne jemi duke bërë hiking në një mjedis rural, e kemi mundësinë të rilidhemi me natyrën, të shijojmë prezencën e momentit dhe t’i pastrojmë mendjet tona. Brengosja dhe stresi i vazhdueshëm e çojnë njeriun në depresion, ankth, ADHD dhe shumë sëmundje tjera mentale.
Sidoqoftë, doktorët pohojnë se nëse shpenzojmë së paku 150 minuta çdo javë në natyrë, ne mund t’i ndryshojmë mendimet dhe sjelljet tona pozitivisht, madje pozitiviteti do të jetë prezent edhe kur i kthehemi punës apo aktiviteteve tjera ditore.
Veç kësaj, një studim tjetër, i kryer nga psikologët Ruth Ann Atchley dhe David L. Strayer, tregoi se kreativiteti për zgjidhjen e problemeve mund të përmirësohet dukshëm nga largimi prej teknologjisë dhe rilidhja me natyrën.
Pjesëmarrësit në studim ecën në natyrë për 4 ditë dhe e kishin të ndaluar të përdornin çfarëdo lloj mjeti të teknologjisë gjatë këtij eksperimenti.
Atyre iu kërkua të kryejnë detyra që kërkojnë mendim kreativ për zgjidhjen e disa problemeve të ndërlikuara. Rezultatet e studimit treguan se aftësitë e pjesëmarrësve në zgjidhjen e problemeve u përmirësuan për 50%.
Zhurma e vazhdueshme urbane e kombinuar me teknologjinë, e shtyjnë njeriun drejt një perfomance të dobët, kurse një ecje e gjatë pa prezencën e teknologjisë mund të qetësojë mendjen dhe të nxisë mendimin kritik, përderisa niveli i stresit ulet.
Hiking-u ul simptomat e ADHD te fëmijët dhe rrit fuqinë e trurit
ADHD (çrregullimi si pasojë e mungesës së vëmendjes për shkak të hiperaktivitetit) po përhapet gjithnjë e më shumë në mesin e fëmijëve. Për shkak të tejkonsumimit të teknologjisë dhe ritmit të shpejtë të jetës, shumë fëmijë po vuajnë nga mungesa e koncentrimit dhe fokusit; ata lehtë shpërqëndrohen.
Shumë prindër u kthehen drogave si zgjidhje, por problemi mund të zgjidhet duke kaluar më shumë kohë në natyrë, sipas një studimi të kryer nga Dr. Frances E. Kup dhe Dr. Andrea Faber Taylor.
Kjo do të thotë se të ekspozuarit e fëmijëve në aktivitete “të gjelbërta” dukshëm pakëson simptomat e ADHD, fëmijët do të jenë më pak të rrëmbyer dhe do të jenë në gjendje të fokusohen më shumë në detyrat e dhëna.
Gjithashtu, Hiking-u rrit edhe nivelin e “hippocampal” – pjesa e trurit përgjegjëse për memorien. Pra e përmirëson dhe parandalon humbjen e memories.
Hiking-u nxit ndjenjat për mirëqenie dhe shpejton humbjen e peshës
Një studim i kryer nga hulumtuesit nga Universiteti British Columbia tregoi se hiking-u zvogëlon stresin dhe largon shqetësimet, rrit vetëbesimin dhe ndihmon në lirimin e endorfinëve (hormonet e lumturisë).
Veç kësaj, ky lloj ushtrimi aerobik është mundësi e shkëlqyer për të humbur 400-700 kalori, varësisht nga vështirësia e ecjes dhe peshës së personit. Pra ju jo vetëm që do humbisni peshë, por edhe do të ndiheni më mirë dhe më të lumtur!
Përfitime tjera nga Hiking:
– përmirëson metabolizmin;
– parandalon diabetin;
– forcon eshtrat dhe përmirëson densitetin e tyre;
– parandalon sëmundjet kardiovaskulare;
– rrit nivelin e energjisë;
– ul rrezikun për kancer;
– lehtëson dhimbjen e shpinës;
– nëpërmjet ekspozimit ndaj diellit, fitojmë vitamin D;
– u jep fuqi muskujve;
– parandalon, madje edhe shëron insomninë.
Për shkak të këtyre përfitimeve dhe të tjerave, rekomandohet që hiking-u të bëhet pjesë e rutinës suaj ditore! Mirëpo edhe nëse e praktikoni atë një apo dy herë në javë, sërish do të bëjë ndryshim pozitiv në jetën tuaj!
Harroni për një çast teknologjinë dhe mediat sociale, shkoni në hiking dhe ndjeheni ndryshimin pozitiv! /tesheshi.com/
