Deputeti i PDK-së Andin Hoti, djali i veprimtarit të çështjeve kombëtare Ukshin Hoti, ka mbrojtur kryetarin e partisë Kadri Veseli, ndërsa ka sulmuar Albin Kurtin për çështjen e flamurit kombëtar.
Hoti thotë se nuk është e lavdishmë që flamuri kombëtar, simboli i historisë të përdoret si kartëmonedhë politike.
“Albin Kurti e ka trajtuar gjithmonë si të tillë flamurin, duke manipuluar me ndjenjat e qytetarëve.
Flamuri mbrohet deri në flijim kur është në rrezik, kurse në liri dashuria dhe respekti për të manifestohet me angazhim dhe përkushtim ndaj interesave të vendit.
Albin Kurti kishte ikur nga flamuri kombëtar kur duhej ta mbronte atë, ndërsa tani e mban në xhep për ta përdorur sa herë t’i duhet për kalkulimet e tij politike.
Albin Kurti kishte refuzuar të merrte armën për ta mbrojtur vendin dhe flamurin, ndërsa sot krekoset paturpësisht, duke keqpërdorur procesin politik nëpër të cilin po kalojmë”, ka shkruar Hoti në Facebook. /tesheshi.com/
