Nuk kalon aq lehtë në Francë, në vendin organizator të Euro 2016-tës, përzgjedhja e lojtarëve që do të luajnë në këtë veprimtari. Zërat për diskriminim për shkak të origjinës kanë nisur të dëgjohen shpesh ditët e fundit.
Fillimisht ka qenë Eric Cantona, ish-sulmuesi i Mançester Junajtedit dhe i Francës, që e ka akuzuar trajnerin Didier Deschamps për përjashtimin e dy lojtarëve me emër për shkak të origjinës së tyre afrikanoveriore.
Për të vijuar me aktorin dhe regjisorin e mirënjohur francezo-maroken Jamel Debbouze, i cili pretendon se lojtarët e shkëlqyer me origjinë afrikanoveriore janë përjashtuar qëllimisht nga kombëtarja franceze.
Ai ka deklaruar se i vjen keq që asnjë prej “përfaqësuesve tanë”, duke i bërë jehonë origjinës së vet, nuk është përzgjedhur për të luajtur për Francën në këtë aktivitet. Mungesa e yjeve me origjinë afrikanoveriore, mendon ai, do t’i shtojë tensionet në rrethinat e varfra rreth qyteteve franceze.
Në fakt, në kombëtare nuk kishte fillimisht asnjë lojtar familja e të cilit vinte nga kolonitë apo protektoratet e Francës në Afrikën e Veriut, si nga Algjeria, Maroku e Tunizia. Adil Rami, një lojtar me origjinë marokene, do të thirrej këtë javë në përfaqësuesen franceze vetëm për shkak të boshllëkut që kishin lënë lojtarët e dëmtuar.
Mes të munguarve spikasin Karim Benzema, sulmuesi i Realit të Madridit dhe një prej më të mirëve në botë, dhe Hatem Ben Arfa. Ky i fundit nuk ia doli të qe në listën përfundimtare të 23 lojtarëve, ndërsa Benzema-së i qe bërë e njohur shumë javë më parë përjashtimi.
“Nuk jam i habitur që ai (Deschamps) e përdori situatën e Benzema-së për të mos e marrë atë. Ben Arfa është mbase lojtari më i mirë sot në Francë. Por ata kanë njëfarë origjine…,” do të thoshte Eric Cantona në një intervistë për britaniken The Guardian javën e shkuar. /tesheshi.com/
